Hevpeymana Hêzên Siyasî ya Kurdistana Îranê, derbarê êrişên dawî yên rejîma Îranê yên li ser partiyên Rojhilatê Kurdistanê yên li Başûrê Kurdistanê niştecihin, daxuyaniyek belav kir.
Daxuyanî wiha ye:
‘‘Ji bo raya giştî, welatan, navendên navnetewî û rêxistinên mafên mirovan!
Rejîma terorîst a Komara Îslamî ya Îranê ji bo sergirtina binketinên xwe yên siyasî, leşkerî û stratejîk yên îdeolojîk, careke din êrişên xwe yên bi mûşek û dronan li ser têkoşerên Rojhilatê Kurdistanê yên li Herêma Kurdistanê zêde kirine. Ev êriş nîşana bêdesthilatî û lewaziya rejîmê ya li hemberî guhertinên herêmî ne.
Li gorî vê Hevpeymaniya Hêzên Siyasî ya Kurdistana Îranê bi sê xalan nêrîna xwe ya li ser rewşa niha radigihîne:
1- Hevpeymaniya Hêzên Siyasî ya Kurdistana Îranê radigihîne ku ev şer û alozî, ne şerê civaka Îranê û neteweyên vî welatî yê bi cîhanê re ye, berovajî vê, ev rejîma dîktator a Komara Îslamî ye ku tevahiya gelê Îranê wek rehîn girtiye. Ev şerê ku niha dest pê kiriye, encama polîtîkayên bi dehan salan ên zêdegavî, destwerdana di karûbarên welatan û piştgiriya terorîzmê de ye, polîtîkayek ku di encamê de hem Îran rûbirûyî hilweşîna aborî kir û hem jî Komara Îslamî ber bi qonaxa hilweşînê ve biriye.
2- Rejîma Komara Îslamî ji destpêka vê qonaxa şer heta niha, zêdetirî 700 caran serweriya xaka Iraqê binpê kiriye û Herêma Kurdistanê kiriye armanc. Di vê navberê de, zêdetirî 150 êrişên rasterast birine ser kampên penaberên siyasî yên Rojhilatê Kurdistanê. Di encama vê destdirêjiyê de, heta niha 21 kes şehîd bûne ku 10 ji wan têkoşer û penaberên endamên Hevpeymaniya Hêzên Siyasî yên Kurdistana Îranê ne. Ligel şermezarkirina van tawanan, em piştgiriya xwe ya tam ji bo aramiya Herêma Kurdistanê radigihînin û hedefgirtina konsolxane, kampên siyasî û cihên niştecihbûna sivîlan wek binpêkirina “Peymannameya Cenevreyê” û wekî tawanekî şer dibînin. Hevpeymaniya Hêzên Siyasî yên Kurdistana Îranê daxwaz ji welatan, Rêxistina Neteweyên Yekbûyî û navendên navdewletî dike ku li hemberî van êrişên Komara Îslamî xwedî helwest bin.
3- Em daxwaz ji hemû hemwelatiyên xwe yên li derveyî welat dikin ku bi awayekî yekgirtî û bi berpirsyariya neteweyî, li kolanan û li pêşiya balyozxane û navendên biryardanê bibin dengê xebat û berxwedana neteweya me. Hevpeymaniya Hêzên Siyasî yên Kurdistana Îranê pêşwaziya her cure hevkariyekê ligel aliyên kurdî, hizb û rêxistinên civaka sivîl û dildar û alîgirên azadî û dadperweriyê dike, ji bo piştgiriya doza Kurd li Rojhilatê Kurdistanê û eşkere kirina tawanên rejîma Komara Îslamî.
Di dawiyê de, em radigihînin ku ev êriş û qurbanî îradeya me naşikînin, berovajiyê wê baweriya me ya bi rewatiya xebata ji bo rûxandina vê rejîmê û rizgariya Kurdistanê bihêztir dike.”
