Berdevkê Parastina Sivîl a Xezeyê Mahmud Bassal diyar kir ku êrîş ji saetên sibehê ve ye dewam dikin û ragihand ku di encama êrîşan de 35 jê zarok û jin herî kêm 100 welatiyên sivîl jiyana xwe ji dest dane.
Bassal da zanîn ku herî kêm 200 welatî birîndar bûne û got ku ev ‘’binpêkirina agirbestê ya bi awayekî eşkere ye’’ û rewşa li Xezeyê weke ‘’bobelatê’’ pênase kir.
TRUMP: AGIRBEST DI TALÛKEYÊ DE NÎNE
Serokê DYE’yê Donald Trump ê ku têkildarî êrîşan hate agahdarkirin, got ku piştî kuştina leşkerekî Îsraîlê, Îsraîlê bersiv daye û got: ‘’Divê Îsraîlî bersivê bidin û didin jî. Lê belê ev yek agirbestê naxe talûkeyê. Wê tu tişt vê agirbestê xirab neke.’’
ÎSRAÎL: LEŞKEREKÎ ME MIR
Artêşa Îsraîlê piştras kir ku li Şerîda Xezeyê leşkerekî wê jiyana xwe ji dest daye. Hate diyarkirin ku leşkerê artêşa Îsraîlê di şer û pevçûnên li herêma Refahê de jiyana xwe ji dest daye.
Îsraîl, îdîa dike ku ew di çarçoveya agirbestê de ji rojhilatê ‘’xeta zer’’ vekişiyaye lê belê nêzîkî niviya Xezeyê di bin kontrola xwe de digire.
RAGEŞÎ JI NÛ VE ZÊDE DIBE
Ev êrîş, piştî bombebarandina 19’ê Cotmehê weke mezintirîn binpêkirina duyemîn tê qebûlkirin. Di wê dîrokê de êrîşeke li dijî leşkerên Îsraîlê weke hincet hatibû nîşandan û operasyona hewayî hatibû lidarxistin.
Hamasê diyar kir ku îdîaya ku wan êrîşî leşkerên Îsraîlê kiriye, ne rast e û da zanîn ku ew girêdayî agirbestê ne.
Li gorî daneyên Wezareta Tanduristiyê ya Hamasê, di encama êrîşên Îsraîlê yên ji 10’ê Cotmehê heya niha de herî kêm 94 Filistîniyan jiyana xwe ji dest dane. Li gel êrîşên nû hejmara kesên jiyana xwe ji dest dane, nêzîkî 140’an bû.
