Meclisa Gelan a Demokratîk a Herêma Bakur û Rojhilatê Sûriyeyê rûniştina xwe ya asayî ya bi hejmara 118ˊan li hola civînan a Meclisa Rêveber a bajarê Reqayê li dar xist. Di rûniştinê de hevserokên Meclisa Rêveber a Rêveberiya Xweseriya Demokratîk a Herêma Bakur û Rojhilatê Sûriyeyê Evîn Siwêd û Hisên Osman, endamên meclisê û nûnerên desteyên qanûnsaz amade bûn.
Paşê beşdaran reşnivîsa Qanûna Parastina Jîngehê ku ji 79 madeyan li ser 4 beşan û 7 deriyan e pêk tê, nîqaş kir. Di reşnivîsê de pênase, armancên qanûnê, avahiya rêveberî, nirxandina bandora jîngehê, çavdêriya jîngehê, parastina jîngehê ji qirêjiyê (hewa, erd û qerebalix), ji bilî parastina cihêrengiya biyolojîk, rûberên şînatiyê, darçandin, rêveberiya çavkaniyên xwezayî, vekolîna jîngehê, serjimarî û plansaziya jîngehê û diyarkirina binpêkirin û cezayan, hene.
Di rûniştinê de Ebîr Hac Ebdullah weke hevseroka Desteya Malbatên Şehîdan, Gazî û Dîlgirtiyên Şer, Omer Berkel weke endamê Meclisa Gelan a Demokratîk ji bo kantina Minbicê, Xelîl Bozan, Ehmed El Xidir û Cuheyne Miso weke endamên meclisê yên kantona Tebqayê, hatin hilbijartin. Kenhan Şêxmûs Berekat jî weke Hevserokê Meclisa Gelan a Demokratîk a Rêveberiya Xweseriya Demokratîk a Herêma Bakur û Rojhilatê Sûriyeyê li şûna Ferîd Etî, hate hilbijartin.
Di dawiya rûniştinê de Ferîd Etî ji aliyê Meclisa Gelan a Demokratîk ve ji bo ked û xebata wî di erkên wî yên berê de weke hevserokê meclisê, hate xelatkirin.
