Rêveberên Partiya Yekitiya Demokratîk (PYD) li bajarê Hesekê û Dirbesiyê bi gel re civiyan, pêşveçûnên siyasî nirxandin û rewşa herêmê nîqaş kirin.
Li bajarê Hesekê civîn li navenda PYD`ê hat lidarxistin û endamên saziyên sivîl, partiyên siyasî û rêxistinên jin tevlî civînê bûn. Civîn ji aliyê endama Desteya Hevserokatiyê ya Partiyê Foza Yûsif û Hevserokê navenda PYD`ê yê bajarê Hesekê Ferhan Dawûd ve hate organîze kirin.
Di civînê de Foza Yûsif rewşa siyasî nirxand û got:”Li Sûriyeyê gelek guhertin çêbûn û ev guhertin bi rewşa herêmî û navneteweyî ya Îranê ve girêdayî bûn. Ji ber rejîma Baas alîgirê Îranê bû.”
Her wiha Foza Yûsif anî ziman ku rewşa herêmê bi şerê li dijî Îranê ve girêdayî ye û hêzên navneteweyî hewl didin ku Iraq, Sûriyê, Tirkiyê û Îranê li gorî xwe ji nûve dizayn bikin.
Foza di berdewamiya gotinên xwe de wiha got:” Gelê Kurd ji sala 2011`an ve parastina herêmên xwe dikin û li hemberî çeteyên DAÎŞ`ê şer kirin. Projeyên gelê Kurd ne parçekirina Sûriyeyê bû, gelên Sûriyeyê parastin û ji bo aştî û aramiya herêmê şer kirin. Li ser dijîtal medya û dezgehên raghandinê gelek hemleyên provokasyonan çêbûn. Dixwestin navbera pêkhateyên herêmê şerê navxweyî çêbibe. Divê em herêma xwe ji provokasyonan biparêzin, têbikoşin heyanî ku bi riyên qanûnî bighîjin mafên xwe û di destûrê Sûriyeyê de nasnameya gelê Kurd were naskirin. Qonaxa lihevkirina 29`ê Çile ya yekem pêk hat, li herêma Cezîrê entegrasyon çêbû û niha li Kobanê jî pêk tê. Di dîroka Kurdan de ev cara yekeme ku parêzgar kurd e, hêzên ewlehiya hundirîn wê herêmê birêve bibin û niha li ser dosya ziman û qebûlkirina bawernameyên Rêveberiya Xweser têne nîqaş kirin. Her wiha li ser zanîngehan nîqaş tê kirin û xwendin bi zimanê kurdî mafekî bingehîn e.”
Ji bo rewşa koçberên Efrîn û Serekaniyê Foza Yûsif wiha got:”Vegera koçberên Efrîn û Serêkaniyê mijara sereke ya lihevkirinê ye û divê gel herêmên xwe birêve bibe.”
DIRBESIYÊ
Rêveberên PYD`ê civîn li navenda Çand û Huner a bajarê Dirbesiyê lidarxistin. Piştî deqeyekê rêzgirtinê Rêveberê PYD`ê Silêman Xelîl axivî û got:”Di vê pêvajoyê de berpirsyartiyeke dîrokî ji me tê xwestin. Divê gelê Kurd di destûra Sûriyeyê de ciyê xwe bigrin. Berxwedanî bi dawî nebûye, em niha ketine pêvajoya berxwedana demokratîk. Têkoşîn bi rêbazên siyasî û rêxistinî berdewam dike. Hikûmeta Demkî ya Sûriyeyê hebûna jinê nasnakê û ev yek nayê qebûl kirin. Divê jin û ciwan li Sûriyeyê di hemû qadan de ciyê xwe bigrin û mafên wan werin dayîn. Mîna Rêber Abdullah Ocalan gotî êrîşa li ser Rojava çêbûyî berdewamiya komploya navneteweyî ye. Bi komplo re berxwedana gelê Kurd kirin hedef, civak dijminahiya hevdû nakin. Lê destwerdana dewletan ji herêmê re û di encama polîtîka wan de şer û alozî çêdibin. Li ser raghandinê jî gelek hemleyên fitnê û provokasyon têne kirin. Divê em neyên van provokasyonan û em li beramberî hemû êrîşan baldar bin.”
Xelîl di nava gotinên xwe de got ku:” Em ji entegrasyonê re vekirî ne, lê belê divê nasnameya gelê Kurd were naskirin, mafên wan bidin û ew xwe birêve bibin. Heyanî mafên hemû pêkhateyan di destûrê Sûriyeyê de werin dayîn, wê têkoşîn û berxwedanî berdewam bike.”
