Medvedev ê ku bi nêzbûna xwe ya bi Kremlîn re tê naskirin, daxuyanî da ajansa dewleta Rûs TASS’ê û îdîa kir ku Rojava li dijî Rûsyayê şerekî tam dimeşîne. Medvedev got, divê Moskow bi hêza tam bersiva vê bide, hetta eger pêwîst bike dibe êrîşên astengkirinê jî bên destpêkirin.
Serokê berê yê dewleta Rûs, got, “Divê em li gorî vê yekê tevbigerin. Divê em bersiveke tam bidin. Eger pêwîst bike, divê em êrîşên astengkirinê bidin destpêkirin.”
‘NIYETEKE ME YA ÊRÎŞKIRINA NATO’YÊ NÎNE’
Medvedev daxuyaniyên lîderên Rojavayî yên têkildarî ku Rûsya amadekariya dagirkirina Ewropayê dike, weke “bêbingeh” pênase kir. Medvedev bi bîr xist ku niyeteke Serokê Dewletê Vladimir Pûtîn a bi şerkirina NATO’yê re yan jî dagirkirina Ewropayê, nîne.
BI DAXUYANIYÊN XWE YÊN ŞER TÊ NASKIRIN
Medvedev bi taybetî ji dema şerê Ûkraynayê destpê kirî û vir ve, gelek caran bi daxuyaniyên dijberê Rojava û alîgirê şer bal dikêşe.
27’ê Gulanê di parvekirina ji hesaba xwe ya X’ê kirî de, xîtabî Serokê DYE’yê kir û got, “Yekane tişta BI RASTÎ JÎ CIDÎ ya ez dizanim, heye: Şerê Cîhanê yê Sêyemîn. Hêvîdar im Trump vê yekê fêm bike!”
Di havîna 2023’yan de jî, îdîa kiribû ku eger artêşa Ûkraynayê xakê ji Rusyayê paşde bistîne, dibe Moskow neçar bimîne ku çeka nukleer bi kar bîne. Medvedev di vê demê de gelek caran hişyariya “qiyameta nukleer” kiribû.
