Partiya Wekhevî û Demokrasiyê ya Gelan (DEM Partî) duh bi dirûşmeya “Budçeya Nan û Aştiyê” meşek ji çar aliyan ber bi Enqereyê ve da destpêkirin. Meşvanên Herêma Marmarayê meşa xwe ya li Tekirdag, Çerkezkoy, Esenyurt û Kartalê temam kirin û îro çûn serdana karkerên ku li navçeyên Çayirova û Gebzeyê yên Kocaeliyê di grevê de ne. Her wiha li Dîlovasiyê bi karkerên veguhastinê re civiyan. Gelek partiyên siyasî û rêxistinên civaka sivîl jî piştgirî dan meşê.
Cîgira Hevserokên Giştî ya DEM Partiyê Sevtap Akdag li cihê şewata kargeha kozmetîk a li Dîlovasiyê ku 7 kesan jiyana xwe ji dest dabûn daxuyaniyek kurt da û got “Em li ber cihê ku ji bo marketên bi 3 tîpan tên nasîn berhemên kozmetîk hildiberîne, dema ku ev berham tên hilberandin tedbîrên tenduristî û ewlehiya karkeran nehatin girtin û rê li ber şewatandina karkeran vekir. Avahiya li vir hatiye hilweşandin, delîlên wê hatine tinekirin. Avahiya Îşkurê ya rast li kêleka me ye û ev cihek e ku rasterast girêdayî wezareta ku ji tenduristî û ewlehiya karkeran berpirsyar e. Em vê têkoşînê ji bo ji nû ve avakirina pêşeroja ku ji wan û zarokên me hatine girtin dimeşînin û em ê vê yekê bidomînin.”
Meşvan piştî serdanên karkeran ber bi navenda bajarê Kocaeliyê ve meşiyan û li wir civînek li dar xistin. Meşvan ji hêla Hêzên Ked, Aştî û Demokrasiyê yên Kocaeliyê ve hatin pêşwazîkirin. Piştî civînê, girse ji pêşiya Banka Navendî ya Kocaeliyê ber bi Parka Mafên Mirovan a Kocaeliyê ve meşiya. Di meşê de timî dirûşmeyên “Heta karker birçî bin, ji patronan re aramî tineye”, “Karkerên Polar SMART’ê ne bi tenê ne” û “Nan, aştî, azadî” hatin berzkirin. Piştî meşê daxuyanî hat dayîn.
Parlamenterê DEM Partiyê Zekî Îrmez di daxuyaiyê de axivî û got, “Budçe bi tevahî budçeyek şer e. Ji sedî 30’ê budçeyê ji bo şer û parastinê tê veqetandin. Yên mayî ji bo rant û sermayeyê tê bikaranîn. Desthilatdar li şûna ku pirsgirêkan çareser bike, bi zêdebûna bihayan û zêdekirina bacan her tiştî daye ser pişta xîzanan. Em ji vê pergala mêtinger re dibêjin na.”
Meşvanên Marmarayê, piştî ku meşa xwe ya li Kocaeliyê temam kir, ji bo beşdarî meşvanên li Bursayê derket rê.
