Partiya Wekhevî û Demokrasiyê ya Gelan (DEM Partî) di pêvajoya nîqaşên li ser Qanûna Budçeya Navendî ya 2026’an de li meclisê tê kirin de 2 rojin ji çar aliyan ve ber bi Enqereyê ve dimeşin. Meşvanan li Îzmîr, Edene û Dîlokê daxuyanî dan.
ÎZMÎR
Meşvan ji Kulturparkê heta Navenda Çandê ya Turkan Saylan a Alsancakê meşiyan û belavok belav kirin. Di belavkirina belavokan de, dirûşmên “Ne mûçeya herî kêm, jiyaneke mirovî” û “Ne ji şer re, ji aştiyê re butçe” hatin berzkirin. Piştre li ber Navenda Çandê ya Turkan Saylan daxuyaniya çapemeniyê hat dayîn.
Di daxuyaniyê de pankarta “Budçeya Nan û Aştiyê” hat hildan. Parlamenterê DEM Partî yê Colemêrgê Onur Duşunmez, nûnerên partîyên siyasî û rêxistinên civaka sivîl û rêveberên DEM Partî ya Îzmîrê beşdarî daxuyaniyê bûn.
Onur Duşunmez di dxuyaniyê de axivî û diyar kir ku bi mîlyonan mirov bi mûçeya herî kêm hewl didin debara xwe bikin û got, “Em ji bo parastina aştiyê ya ku bi qasî nan pîroz e, li vir in. Di dewleteke civakî de divê ti welatî birçî ranezê. Budçeya ku ji bo şer tê veqetandin, divê ji bo aştî û pêşeroja civakê were veqetandin.”
Piştî daxuyaniyê meşvan derbasî Deriyê Montro ya Kulturparkê bûn û ji wir ber bi Enqereyê ve bi rê ketin.
DÎLOK
Milê meşê li Parka Kırkayak a navçeya Şahînbeyê ji aliyê Saziya Platformên Demokratîk a Dîlokê (DEKUP) ve hat pêşwazîkirin. Girse bi erbaneyan hat pêşwazîkirin û bi berzkirina dirûşmeyên “Ne ji şer re, ji aştiyê re budçe” û “Nan, aştî, azadî” ber bi Saklibahçeyê ve meşiya.
Hevserokê SYKP’ê Mertcan Tîtîz li wir axivî û diyar kir ku budçe ne tenê hesabkirinek teknîkî ye. Tîtîz bal kişand ser çavkaniyên ku ji bo lêçûnên şer hatine veqetandin û got, “Nabe ku li aliyekî ji bo şer budçeyê veqetînin û li aliyê din jî nikaribe xwarinek bide zarokan.”
Piştî axaftinan, gel nameyên ku daxwazên wan tê de bûn radestî şandeyê kirin. Piştre şande ber bi Edeneyê ve bi rê ket.
EDENE
Meşvanên Herêma Çûkûrovayê piştî sedrdanên li Hatya û Mêrsînê, li Parka Înonu ya Edeneyê civiyan. Meşvan bi berzkirina dirûşmeyên “Ne ji şer re, ji kedkaran re budçe” û “Ne ji şer re, ji aştiyê re budçe” ketin parkê.
Hevseroka DEM Partî ya Edeneyê Helîn Kaya di çalakiyê de axivî û diyar kir ku ew li dijî budçeyek ku ne di berjewendiya gel de ye derdikevin û daxwaza budçeyek ku li gorî gel be dikin.
Endamê MYK’ê yê DEM Partiyê Mehmet Saltoglu jî diyar kir ku ew ê bi vê meşê re daxwazên karker û kedkaran bibin Enqereyê û got, “Ger em vê têkoşînê bi hev re mezin bikin, em ê bi ser bikevin. Em bihêz in û em ê bi hev re bi ser bikevin.”
Parlamentera DEM Partî ya Rihayê Dîlan Kunt Ayan jî diyar kir ku çavkaniyên ku ji bo polîtîkayên şer têne veqetandin wekî xizanî vedigerin gel û banga “Ne ji bo şer, em ji bo karkeran budçeyê dixwazin; ne ji bo şer em ji bo perwerdehiyê budçeyê dixwazin.” Dîlan Kunt Ayan bal kişand ser banga Aştî û CIvaka Dmeokratîk a ku Rêber Apo di 27ê Sibatê kiribû û got, “Meşa me wê ji bo bidawîkirina pevçûna 52 salan, ji bo rê li ber siyaseta demokratîk were vekirin û ji bo ku budçeyê ji jin, kedkar, cotkar û bindestan re were veqetandin, berdewam bike.”
Hevserokê DAD’ê Zeynel Kete jî diyar kir ku divê budçe şefaf, demokratîk û adil be.
Li ser navê Dayikên Aştiyê Suphiye Bayav axivî û bi bîr xist ku ev saleke xwîn û mirin çênebûye û xwest ku budçeya ku ji bo şer hatiye veqetandin ji bo gel, karker û zarokan were veqetandin.
Daxuyanî bi bi gerandina govendê bi dawî bû û meşvan ber bi Enqereyê ve bi rê ketin.
