Komîteya Navendî ya MLKP’ê ji bo pêşengên têkoşînê Nûreddîn Sofî û Koçero Urfa yên ku şehadeta wan ji aliyê Navenda Ragihanê ya HPG’ê ve hatin ragihandin, daxuyanî da. Di daxuyaniyê de hate gotin ku qetilkirina Sofî û Koçero û veqetandina wan ji têkoşînê ne tenê ji bo tevgera neteweyî ya demokratîk, ji bo hemû hêz û gelên ku ji bo azadî, dadmendî û wekheviyê têdikoşin jî birîneke giran e.
Di daxuyaniyê de ev hatin gotin:
“Nûreddîn Sofî (Nûreddîn Xelef Mihemed) di salên xwendekariyê de li Şamê tevlî têkoşîna rêxistinê bû û 32 salan bê navber li Bakur, Başûr û Rojhilatê Kurdistanê têkoşiya. Hevrê Sofî endamê Komîteya Navendî yê PKK’ê bû, di demên cuda de di Konseya Rêveber a KCK’ê û di Fermandariya Giştî ya HPG’ê de erk girt. Wekî Fermandarê Eyaleta Amedê bi helwest û çalakiyên xwe di salên 2003-2004’an de ji bo têkbirina tasfiyekaran roleke girîng leyîst. Bi hemû ezmûn û tecrubeyên xwe, di Şoreşa Rojava de bû yek ji pêşengên ku serketin bi dest xist. Bîranîna wî wê hêzê bide têkoşîna şoreşgerî ya yekgirtî. Helwesta wî rê li ber tevlîbûna hêzên komunîst û şoreşger ji bo parastin û avakirina Şoreşa Rojava vekir, wekî mîrateke şoreşgerî wê ji nifşên nû re bê veguhastin.
Hevrê Koçero Urfa (Metîn Arslan) di salên zanîngehê de li Îzmîrê tevlî têkoşîna azadiya neteweyî bû, 28 salan di refên têkoşînê de têkoşiya. Wekî endamê Komîteya Navendî ya PKK’ê û Fermandarê Akademiyên Apollo bi ruhê fedaî hemû erkên xwe pêk anî. Di salên 2003-2004’an de tasfiyekar newêrîbûn nêzî wî bibin û ew bû şoreşgerekî ji agir. Koçero Urfa wekî kesekî erkdar û dilsozê doza azadiyê wê timî îlhamê bide têkoşîna azadiyê.”
