Meclisa Sûriyeya Demokratîk (MSD) di panêleke diyalogê de, bi beşdariya komek ji kesayetên siyasî, olî û rûspiyên ji hemû pêkhateyan, rewşa siyasî ya niha ya li Sûriyeyê nîqaş kir. Di heman demê de hate diyarkirin ku li herêmê guhertineke mezin pêk tê, lewma ji her kesî tê xwestin ku erkên xwe ji bo avakirina dewletek demokratîk pêk bîne.
MSD`ê li bajarê Qamişlo, bi beşdariya siyasetmedar, rewşenbîrî û çalakvanên mafên mirovan ên Kurd, Ereb û Suryanî, nûnerên rêxistinên sivîl û kesayetên olî û serbixwe panêleke diyalogê ya berfireh bi sernanavê “Xwendina rewşa siyasî ya heyî û rola hevpeymanan di rizgarkirina Sûriyeyê de” li dar xist.
Di panelê de, hevserokê MSD`ê Dr. Mehmûd El Muslit diyar kir ku li Sûriyeyê pêdivî bi rêyekê heye ku gelên wê bike yek û wan ber bi Sûriyeya nû ya ku ew xeyal dikin ve bibe. Her wiha El Muslit anî ziman ku divê ew nakokiyên xwe bidin aliyekî da ku Sûriyeya ji bo her kesî be û banga piştgirîkirina Peymana 10’ê Adarê kir.
“SÛRIYEYÊ JI QONAXEKE KRÎTÎK DERBAS DIBE”
Hevserokê nivîsgeha têkiliyan a MSD`ê Hesen Mihemed Elî rewşa siyasî ya heyî û rola hevpeymanan di rizgarkirina Sûriyeyê de şîrove kir û piştrast kir ku qonaxa ku welat tê re derbas dibe krîtîk e, ew ê çarenûsa Sûriyeya nû, modern û bingehîn diyar bike, ku tê de çarenûsa hemû gelan wê were destnîşankirin, lewma bang li her kesî kir ku di vê qonaxê de berpirsiyariyên xwe pêk bîne.
Mihemed Elî hişyarî da ku her şaşîyek wê wan ber bi kaoseke din ve bibe û wiha rave kir: “Em Sûriyeyekê dixwazin ku me ji xwe dûr nexe û ya hemû Sûriyan be, her kes bi wekhevî lê bijî, ne ku em cudahî di navbera Sûriyan de bikin.”
“HERÊM DI PÊVAJOYA DAMEZRANDINÊ YA NÛ DE YE”
Mihemed Elî destnîşan kir ku Sûriyeyê û Rojhilata Navîn di qonaxa damezrandina nû de ne, gelek rejîm hilweşiyan û yên nû hatine avakirin, ev yek derfeteke dîrokî dide gelan.
Elî di berdewamiya axaftina xwe de wiha got: “Eger em stratejiyên rast pêş bixin, em dikarin di hevkêşeya navneteweyî de bibin aktorekî sereke. Gelek gel hatine marjînalîzekirin û eger ew polîtîkayên rast bişopînin, armancên wan dê pêk werin.”
“HEMÛ SÎSTEMÊN NAVENDÎ HILWEŞIYANE”
Mihemed Elî destnîşan kir ku hemû sîstemên navendî hilweşiyane, ji Iraqê bigire heta bihara Ereban, projeyên avakirina korîdorên aborî yên sînor hene, ev yek taybetmendiyên herêma nû nîşan dide. Ji ber vê yekê, Hamas, dû re Hizbullah hatin armancgirtin.
Her wiha Mihemed diyar kir ku Tirkiyeyê êdî ne ew welat e ku rola sereke dilîze û teqez kir ku berî hilweşîna rejîmê û berî ragihandina bidawîbûna Peymana Sykes-Picot, dixwest destwerdanê li herêmê bike û ji kaosa heyî sûd werbigire.
“SÛRIYEYÊ VENAGERE SÎSTEMEKE NAVENDΔ
Hesen Mihemed Elî piştrast kir ku Sûriyeyê nikare vegere serdema sîstema navendî, ji ber ku her kes li dijî zordarî û navendîbûnê têkoşiya, her wiha Sûriyeyî nikarin bi sîstemeke navendî ku tê de welatî têne paşguhkirin razî bibin, şêweyê hikûmetê di Sûriyeya nû de dê nenavendî be.
Piştî wê, beşdaran nerînên xwe bînin ziman û diyar kirin ku serkeftina Sûriyeyê bi 4 xalên sereke ve girêdayî ye: serxwebûna biryardana neteweyî, zelabûna di kar de, beşdarbûna hemû beşên gelê Sûriyeyê û dûrketina ji nakokiyên derveyî li ser axa Sûriyeyê.
