Meclîsa Giştî ya Meclîsa Sûriyeya Demokratîk (MSD) civîna xwe ya asayî li bajarê Hesekê li dar xist. Di civînê de hevseroketiya MSD’ê, endamên Meclisa Giştî û serokên partî û hêzên siyasî yên di bin siya MSD’ê de amade bûn û geşedanên li ser asta Sûriyeyê, guhartinên herêmî û navneteweyî û rola MSD’ê di vê qonaxê û qonaxa bê de, nîqaş kirin.
Di serî de guhartinên heyî û têkçûna hevsengiya geosiyasî û bandorên wan li ser Sûriyeyê hatin gotûbêjkirin. Beşdaran diyar kir ku pêwîste bi nêrîneke niştîmanî ya giştî li gorî hêviyên gelê sûriyeyê dan û standin bi van guhertinan re were kirin.
Girêdayî mijarê hevserokê MSD’ê Mehmûd El Mislet diyar kir ku “Danezana destûrî” nûnertiya pêkhateyên Sûriyeyê û xwezaya pirreng a civaka Sûriyeyê, nake û got: “Gelê Sûriyeyê li hemberî paşguhkirin û cudakirinê rabû, nabe beşeke mezin ji gelê Sûriyeyê dîsa were paşguhkirin.”
El Mislet diyar kir ku MSD’ê weke pira siyasî ya di navbera pêkhateyan de û hêza ajo ya ber bi guhertina siyasî ya aştiyane û demokrasî ve xwedî rola sereke ye.
Hevseroka MSD’ê Leyla Qereman diyar kir ku di vê qonaxê de pêdivî bi yekkirina kedê û pêşîgirtina li fitneyên di navbera pêkhateyan heye û got: “Pêdiviya Sûriyeyê ji her demê zêdetir bi guhartina siyasî ya giştî, diyaloga nîştîmanî û lihevkirinan heye. Her lihevkirina di navbera Sûriyeyiyan de dikeve xizmeta yekitiya pêkhateyên Sûriyeyê. Ji bo avakirina Sûriyeya nû ku tevahî pêkhateyan di nav xwe de bihewîne, avakirina pirên baweriyê û xurtkirina nasnameya niştîmanî pêwist in.”
Leyle Qereman wiha domand: “MSD’ê çarçove û hevbendiya niştîmanî ye, dikare rola xwe di vê qonaxa yestiyar de bilîze û dikare bi tevahî hêzan re ji bo avakirina Sûriyeya nû pêywendiyan bike.”
Beşdarên civînê axivîn û girîngî da pêkanîna agirbestê li seranserî Sûriyeyê, pêşîgirtina hewldanên veguhastina Sûriyeyê ji bo qada şerên herêmî û navneteweyî û amadekirina zemîneke aram ji bo her pêvajoya siyasî ya pêşerojê.
Di nîqaşan de bal li ser teşeya dewleta pêşerojê ya Sûriyeyê, xwezaya sîstema siyasî ku tê de mafên tevahî Sûriyeyiyan misogerkirî bin hat kişandin. Beşdaran anî ziman ku hem pirrengiya neteweyî, hem olî û siyasî di “Danezana destûrî” û avakirina hikumeta Sûriyeya nû de hatin paşguhkirin. Her wiha hat destnîşankirin ku nebûna nûnertiya rasteqîn a tevahî pêkhateyan parçekirinê kûr dike û li dijî nêrîna avakirina dewleta demokratîk a nûjen a xwe dispêre hemwelatîbûna wekhev, adalet û pirrengiyê. Ji lewre divê pêvajoya siyasî ji nû ve li gorî bingehên nû û giştî werin sazkirin.
Hevseroketiya MSD’ê encamên serdanên li Şamê û hevdîtinên bi gelek hêzên siyasî yên li Sûriyeyê re kirine, her wiha civînên bi Wezîra karên Derve ya Almanya, şandeyên dîplomasî yên li Ewropa, Misir, Amerîka hatine kirin, pêşkêş kirin û ew bi erênî û berhemdar wesif kirin.
