Malpera Dengê Binçavkiriyên Kurd û Îranê ragihand ku jinek Kurd bi navê Şeyda Ezîzî ya xelkê Sine ya Rojhilatê Kurdistanê ji aliyê liqa yekem a Dadgeha Şoreşê ya Sineyê ve bi tometa ‘hewldana ji bo xirabkirina ewlekariya neteweyî’ bi sê sal cezayê girtîgehê hate mehkûmkirin.
Hate diyarkirin ku Şeyda Ezîzî di dema şerê 12 rojî yê Îran û Îsraîlê de li Sineyê bêyî fermana dadwer hatibû binçavkirin û şandibûn girtîgeha bajêr.
Her wiha hate ragihandin ku du girtiyên jin ên siyasî yên li girtîgeha Evînê bi navê Merziye Farisî û Ferûx Teqî Pûr bi pirsgirêkên fîzîkî re rû bi rû ne û nayên dermankirin.
Li gorî heman çavkaniyê her du girtiyên siyasî di sala 2023’yan de di dema salvegera xwepêşandanên Şoreşa ‘Jin, Jiyan, Azadî’ de hatibûn binçavkirin û ji bo girtîgehê Evînê hatibûn şandin. Her yek ji girtiyên jin ên siyasî piştre ji aliyê dadwer Îman Efşarî li dadgeha Şoreşê ya Tehranê ve bi tometa ‘peywendiya bi muxalefeta dijî Îranê re’ bi 15 sal cezayê girtîgehê hatibûn mehkûmkirin.
