Ji ofîsa Netanyahu daxuyaniyeke kurt hate dayîn û hate diyarkirin ku vexwendina Trump hatiye qebûlkirin û konsey wê ji serokên welatên cuda pêk were.
Tê îfadekirin ku ‘’Konseya Aşitiyê’’ ku di destpêkê de bi armanca çavdêrîkirina jinûveavakirina Şerîda Xezeyê hatibû sêwirandin, li gel pêşnûmaya ji aliyê Trump ve hate pêşkêşkirin veguheriye avaniyeke xwediyê gelek rayeyên berfirehtir.
Li gorî vê yekê konsey wê bes ne li Xezeyê li seranserê cîhanê têkariyê li çareseriya şer û pevçûnan bike. Tê payîn ku serokatiya konseyê jî wê ji aliyê Trump ve were kirin.
Konseya Ewlehiya Neteweyên Yekbûyî da zanîn ku ew piştgiriyê dide plana Trump a têkildarî Xezeyê avakirina ‘’Konseya Aşitiyê’’ lê belê ew bes bi armanca jinûveavakirina Xezeyê re sînordar e. Berdevkê Sekreterê Giştî yê NY’ê Farhan Haq da zanîn ku ew raye li ser qadên din nehatiye berfirehkirin.
Piştî agirbesta hesas a li gel zexta DYE’yê si 10’ê Cotmehê de kete meriyetê, Trump da zanîn ku ew derbasî qonaxa duyemîn a planê bûne. Lê belê Îsraîl û Hamas bi berdewamî têkildarî binpêkirina agirbestê hevûdu sûcdar dikin. Hikûmeta Netanyahu hişyariyê dide ku ger Hamas bêçekbûnê qebûl neke ew ê dubare dest bi êrîşan bikin.
Tê payîn ku di qonaxa duyemîn a plana Trump de Hamas were bêçekkirin, artêşa Îsraîlê gav bi gav ji Xezeyê vekişe û hêzeke navneteweyî were bicihkirin. Netanyahu jî dubare diyar kir ku ew li dijî avakirina dewleta Filistînê ye û helwesta xwe ya li dijî nêzîkatiya Neteweyên Yekbûyî ku parastina çareseriya dudewletî dike, didomîne.
