Jiyana her qehremanekî tekoşîna azadiyê, ji bo dîrokê destaneke bê dawî ye. Her ku ev destan tên nivîsîn, gotin û hevok nema têrê dike ku mirov jiyana van gernasan pênase bike. Meş û jiyana her milîtaneke Apoyî mîna heybeta çiyayên Zagrosa ye. Gerîlayên Azadiya Kurdistan ji bo jiyaneke azad ji gelê xwe re misoger bikin di rêya fedaiyan de li ser şopa Mazlûm, Kemal, Bêrîtan û Zîlanan dimeşin. Ev rêyeke jêneveger e ku ji zarokên agir yên bi hestên tolhildanê ve mezin bûne. Gerîlayên ku di vê rêyê de bi hemû hêz, vîn û cesareta xwe ve meşiyane, bûne lehengên herî hêja yên ku ji bo azadiyê canê xwe kirine diyarî. Yek ji rêwiyên qehreman ya di vê rêyê de bûye pêşenga demê gerîlaya azadiyê Dîrok Cûdî ye.
Solîn Başturk li Tilhemîs di nava malbateke Mihelmî de çavê xwe li cîhanê vedike. Keça ciwan li Qamişlo di nava dorhêleke welatparêz ya Kurd de mezin dibe. Dema ku Solîn digihîje temenekî ciwan şoreş li Rojavayê Kurdistanê destpê dike. Ew bi çavên xwe ve, ji nêz ve, ji şoreşa Rojava re şahidî dike. Pêngavên rizgariyê, şerê li dijî DAÎŞ’ê û bi taybet jî rizgarkirina gelê Ereb ji nav lepên DAÎŞ’ê pir li ser bandor dike. Bi taybet jî sekna jina Kurd û tevahî jinan, ku bi vînek mezin li hember zihniyeta zilamsalar şer dikin bandor dibe. Helbet dorhêla ku tê de mezin bûye jî bandoreke erênî li ser ava dike. Piştî ku bi çavên xwe yê belek ve ji van hemûyan re şahîdî dike, biryar dide ku ew jî bibe perçeyeke vê têkoşînê. Lewma dibe dilsoza vê biryara xwe û di sala 2017’an de berê xwe dide çiyayên azad.
DÎROKA ÇIYAYÎ DIBE HÊZA ÇIYAYAN
Gavên destpêkê, hestên destpêkê, gerîlayên destpêkê dîtin, di ruhê jina asî de vejîneke nû avadike. Bi vê vejîna nû re ew navê xwe dike Dîrok Cûdî. Ew ji netewke Ereb beşdarî nava tekoşîna azadiyê dibe. Ji bo wê jî ew dixwaze mîna navê xwe di nava tekoşîna azadiyê de bibe xwedî dîrokeke têr û tije berxwedan û şerkerî. Dilvîna ciwan gavên xwe yî yekem yê hatina çiyayên azad û yê di nava gerîla de wiha tîne ziman: “Ez tevlîbûn û hatina xwe ya çiya ji xwe re weke şensekî mezin dibînim. Bi taybet weke jinekê hatina çiya û di nava vê tekoşînê de cihê xwe girtin heyecaneke mezin dida min. Weke jin li van çiyayan rastiya xwe zanîn, ji bo min pîroziyeke ye. Van tiştan di min de bîr û baweriyek da avakirin. Zehmetiyên çiya jî hişt ku ez hîn baştir hêza xwe derxim holê û zêdetir ji jiyanê hez bikim.”
Dîroka çiyayê li çiyayên azad êdî wiha ji jiyanê hezdikir ku di berdêla wê de hazire ku canê xwe feda bike. Piştî ku ew perwerdeya xwe dibîne, berê xwe dide qadên pratîkê. Weke gerîlayek enternasyonal di nava demeke kin de berê xwe dayina qadên pratîkê ji bo wê şanseke mezin bû. Ew jî vî şensî ji xwe re dinirxîne û di nava demeke kurt de pêşketinên mezin di kesayeta xwe de ava dike. Bi taybet jî di pratîka destpêkê de di nava tabûrekî xweser yê gerîlayên YJA Star’ê de cih girtin, ji bo milîtantiyeke rast di xeta jina azad de dayina meşandin de jê re dibe bingehek. Dîroka dilderyayî ji bo vê wiha hest û nêrînên xwe tîne ser ziman: “Tişta yekem jî ez di nava vê tekoşînê de jê bandor bûm jî nêzîkatiyên hevalên jin bû. Kombûna her hevaleke jin ji bajar yan welatekî, ji netewên cûda li yek cihî ji bo meşandina tekoşîna azadiya jinê di min de xwesteke mezin ava dikir. Her çiqasî tu zehmetiyan bikşînî yên ku destpêkê destê xwe ji te re vedike û dibe alîkar rêhevalên te yên jin in. Bi taybet jina ku tenê jê re karên malê hatiye veqetandin, li ser van çiyayan bûyina gerîlayeke ku bejna xwe bi çek û rext pêçaye di min de hêviyên pir mezin ava kir. Ev jî hişt ku ez hîn zêdetir gav bi pêş ve bavêjim, tekoşîn bikim û di kesayeta xwe de pêşketinên mezin ava bikim.”
Piştî ku gerîla Dîrok Cûdî pratîka xwe ya yekem di nava nêvengeke xweser dederbas dike, ji bo bûyina gerîlayeke YJA Star’ê ya şerker, pispor û wêrek berê xwe dide akademiya pisportiya leşkerî. Ew li ser vî hîmî xwe di pisportiya leşkerî de pêşdixe. Dibe pisporeke çekan û di taktîkên şerê gerîla de xwe kûr dike. Hêza jina şerker derxistina holê û tekoşîneke bê eman dayina meşandin jê re, yek ji pîvanê jiyana wê bû. Ew bi serkeftî perwerdeya xwe diqedîne û bi gelek danehevan careke din berê xwe dide pratîkê.
REMZA HEVGIRTIN Û XWIŞK Û BIRATIYA GELAN
Vê carê Dîrok wê jiyan û tekoşîna xwe bi destaneke mezin ve derbasî dîroka lehengên tevgera azadiyê bike. Qada Xakurkê jî li hêviya gerîlayeke ciwan, şerker, bi vîn, wêrek û xwedî sekneke milîtanên Apoyî bû. Gerîlaya YJA Star’ê qada Xakurkê pir zêde di bendewariyan de nahêle û ber bi wir ve dibe rêwî. Ew weke şoreşgereke mezin, milîtaneke Apoyî ku xwe di xeta jina azad de kûr kiriye bê dudilî bi hemû hêza xwe ve têkoşîn dike. Her kêliyeke jiyana xwe ya şoreşgerî tije derbas dike. Li ser şopa Bêrîtan û Zîlanan dibe pêşengeke demê. Ew li vir jî bi hevaltiya xwe ya dilpak ve, dil nizmî û jîrbûna xwe ve tê nasîn. Li hember hemû şert û mercên zehmet, weke çiyayekî bi tevahî heybeta xwe disekine. Ji ber ku ew ramanên Rêber APO hembêz kiriye, ti astengî li pêşiya meşa wê naba kelem. Di sengerên şer de ew dibe hêza Apoyî û bersiva herî xurt li hember dagirkeriyê. Gerîla Dîrok Cûdî mîna heybeta çiyayê Cûdî dibe xwedî sekneke fedaiyane. Şerkera bi ezim di Tîrmeha sala 2024’an de digihîje şehadetê û dibe lehengeke bê mînak. Ew da dû xeyalê xwe û navê xwe mîna dîrokekê derbasî pirtûka qehremanên fedaî kir. Wê bi qasî ku ji jiyanê hezkir, ewqas xwe di oxira wê de feda kir. Ew jî mîna gelek hevreyên xwe yên enternasyonal bû sembola xwişk û biratiya gelan û fedayiya welatê rojê.
