Komîserê bilind ê mafên mirovan ê Neteweyên Yekbûyî (NY) duh got, ew “hîna raporên tirsnak ên der barê revandin û windabûna bi darê zorê li Sûriyeyê” werdigrin û diyar kir ku ji serdema rejîma Beşar Esed ve zêdetirî sed hezar kes winda ne.
Komîseriyê destnîşan kir ku dosyaya windahiyên li Sûriyeyê yek ji astengiyên herî mezin ên mirovî ye û bi bîr xist ku ji dema rûxandina rejîma Esed ve hin malbatan hezkiriyên xwe dîtin, lê hîna jî hejmareke mezin a malbatan ji ber agahî li ser çarenûsa xizmên xwe yên windayî wernegirtine, di nava fikaran de ne.
Berdevkê komîseriyê Semîn El Xîtan li Cinêvê di civîneke çapemeniyê de got: “Divê aqûbet û cihê hemû kesên winda çi yên berî rûxandina rejîma berê û çi yên piştî wê, bi lez werin zelalkirin.”
El Xîtan anî ziman ku komîserî piştgiriyê dide tevahî saziyên serbixwe yên têkildarî kesên winda li Sûriyeyê. El Xîtan got, pêkanîna edaletê gava pêşîn a ber bi avakirina siberojeke aştiyane û ewle ji bo gelê Sûriyeyê ve ye.
