Yekitiya Ragihandina Jin (YRJ) konferansa xwe ya 4’emîn bi dirûşma “Bi mezinkirina YRJ’ê em ê bibin dengê şoreşa jinê” li dar dixe. Konferans li hola Zanîngeha Rojava ya li bajarê Qamişlo yê kantona Cizîrê ya Bakur û Rojhilatê Sûriyeyê tê lidarxistin.
Piştî rêzgirtina ji giyanê şehîdan, axaftina vekirinê, hilbijartina dîwanê û axaftina hevseroka Daîreya Têkiliyên Derve ya Rêveberiya Xweser Îlham Ehmed, endama koordînasyona Kongra Star Nêrgiz Mihemed axivî.
Nêrgiz Mihemed konferans li Rêber Apo û tevahî jinên azadîxwaz pîroz kir û got: “Rêber Apo got hîna dîroka jin nehatiye nivîsîn. Dê ev bi têkoşînê bê nivîsîn. Di têkoşîna azadiyê de jinan gavên dîrokî avêtin. Ragihandina me ya azad kêlî bi kêlî ev têkoşîn tomar kir. Di şoreşa Rojava de jî, ji bo şoreş bibe şoreşa civakê û jinan, rola YRJ’ê girîng û pêşeng e. Eger em îro dibêjin şoreşa Rojava şoreşa jinê ye, wê demê dê ragihandina jinê vê bigihîne tevayî cîhanê. Ji ber wê Şoreşa Rojava evqas bi nav û deng bû. Em çiqas xurt bin û xebatên me xurt bin, eger ragihandin nebe zimanê wê û bi jinên cîhanê re parve neke, dê cîhan pê nizanibe. Hişt ku bi hezaran jinên enternasyonal xwe bigihînin şoreşê. Niha li Sûriyê li Peravê ewqas komkujî li ser jinan hatin meşandin, li Siwêyda heman tişt hatin kirin. Gelê Siwêyda û Peravê spasiya ragihandina azad kir û gotin we dengê me gihand cîhanê. Ji bo em rola xwe xurttir bilîzin, bibin dengê tevayî jinên cîhanê, ji bo em kêmaniyên xwe derbas bikin ev konferans girîng e.”
Nêrgiz Mihemed qala pêvajoya çareseriya pirsgirêka Kurd û demokratîkkirina Tirkiyeyê kir û wiha got: “Îro pêvajoyê dest pê kiriye, îro Rêber Apo pêvajoyek daye destpêkirin, îro ya pêşengiya vê pêvajoyê bike jin e.”
Piştî axaftinan sînevîzyonek li ser armancên avabûna YRJ’ê û xebat wê hat nîşandan. Piştre rapora xebatên 4 salan bi kurdî û erebî hate xwendin û konferans ji çapemeniyê re girtî didome.
Piştî nîqaşên li ser rewşa rêxistinî û rêziknameyê dê konferans bi daxuyaniyekê bi dawî bibe.
