Komîteya Ekolojiyê ya Partiya Jiyana Azad a Kurdistanê (PJAK), derbarê bûyerên li Çiyayê Aviyerê ya bajarê Sineyê daxuyaniyek da.
PJAK’ê daxuyand ku di 24’ê Tîrmehê de şewata li Çiyayê Aviyerê ya Sineyê bûye sedema birîndarbûna jîngeh parêzan û aktivîstê ekolojiyê Hamîd Muradî jî jiyana xwe ji dest da. PJAK’ê ragihand ku ew îro agahdarbûne ku parazvanên jîngehê Çiyako Yusif Nejad û Xebat Eminî jî jiyana xwe ji dest dane.
Di daxuyaniya PJAK’ê de ev xal hatin diyarkirin: “Ew ji bo me şehîdên jîngehê yên Zagrosê ne. Em ji malbatên wan ên hêja û gelê xwe re sersaxiyê dixwazin û şehîdan bi bîr tînin. Em bawer dikin ku gelê me bi beşdariyeke girseyî ya merasîmên cenazeyan, wê xwedî li ked û têkoşîna şehîdan derkeve.
Weke Komîteya Ekolojiyê ya PJAK’ê, em ji gelê xwe û malbatên şehîdan re sersaxiyê dixwazin. Fedakariya aktîvîstên jîngehê yên ku jiyana xwe ji dest dane, nayê jibîrkirin. Em bawer dikin ku hewldanên gelê me ji bo pêşîgirtina li bûyerên bi vî rengî, wê rê li ber felaketên mezintir bigire.”
