Partiya Jiyana Azad a Kurdistanê (PJAK) bi boneya 14’emîn salvegera şehadeta Gerîlayên Azadiyê Egîd Toşpa, Sarya Onur, Şahan Dijrabûn û Têkoşer Viyan ku sala 2011’an di dema Destana Qendîlê de li devera Zimzîran a Rojhilatê Kurdistanê şehîd bûn, daxuyaniyek belav kir.
Daxuyaniya PJAK’ê wihaye:
“Em di 14’emîn salvegera şehadeta hevrêyên me yên hêja Egîd Sine, Sarya Onur, Şahan Dijrabûn û Têkoşer Viyan de ku sala 2011’an di Destana Qendîlê de li Rojhilatê Kurdistanê şehîd bûn, hemû şehîdên tevgera azadiyê bi bîr tînin.
Piştî êrîşa Artêşa Pasdaran ya li ser herêma Qendîlê, di sala 2011’an de, hevalên me yên hêja endamê Meclisa PJAK’ê Tayib Rehîmî bi nasnav Egîd Sine, Nûrcan Demîr bi nasnav Sarya Onur, Îsmaîl Yaman bi nasnav Şahan Dijrabûn û Selahedîn Seydî bi nasnav Têkoşer Viyan, di encama çalakiyek fedayane ya li navçeya Zimzîran a dikeve navbera Mihabad û Serdeştê de şehîd bûn.
Ev heval gihiştin lûtkeya fedakarî û îradeya xwe ya şoreşgeriyê da ku li hember êrîşên qirker û wêranker ên rejîmê bisekinin. Di demek ku herêma Qendîlê di bin êrîşên giran ên bi deh hezaran leşkerên Îranî û kirêgirtiyên wê de bû, di 23’ê Tîrmeha 2011’an de wan çalakiyek fedayî li dijî baregeha hêzên rejîmê ya Zimzîranê pêk anîn û bi şehîdbûna xwe parastina gelê me kirin.
Ev çalakiya fedayî, bi pêşengiya Endamê Meclisa PJAK’ê Şehîd Egîd û Şehîd Sarya, bi asteke bilind a fedakariyê ji bo doza rewa ya azadî û parastina gelê me hate lidarxistin. Hevrêyên me îspat kirin ku bi saya têkoşerên wiha, Tevgera Azadiya gelê me qet bi rêbaz û şêwazên hovane û qirker nayê tunekirin.
Şehîdên 23’yê Tîrmehê serkeftina Qendîlê misoger kirin. Ew bûn mînakek baş a têkoşîna li dijî faşîzmê. Fedakariya wan bû sedema xuliqandina Destana Qendîlê û têkbirina plana dijmin a ji bo tunekirina wê. Îro, bi saya van fedayiyan, tevgera me ya azadiyê ji her demê bi hêztir e.
Bê guman, îro gelê me li her çar beşên Kurdistanê ji her demê bêtir bi êrîşên dijminane re rû bi rû ye. Her wiha yekane rêya xilasbûna ji pêla şerxwaz a dijminan, berdewamkirina rêya rast a têkoşîna şehîdên 23’ê Tîrmehê heta bidestxistina azadiya mayînde ye.”
Agahiyên di derbarê nasnameya şehîdan de wihaye:
Nav û paşnav: Tayîb Rehîmî
Nasnav: Egîd Toşpa
Cih û dîroka dayîkbûnê: 1981- Sine
Dîroka tevilbûnê: 2000- Endamê Meclisa PJAK’ê
***
Nav û paşnav: Nurcan Demîr
Nasnav: Sarya Onur
Cih û dîroka dayîkbûnê: 1980- Idir
Dîroka tevilbûnê: 1998
***
Nav û paşnav: Îsmaîl Yaman
Nasnav: Şahan Dijrabûn
Cih û dîroka dayîkbûnê: 1986-Wêranşar
Dîroka tevilbûnê: 2008
***
Nav û paşnav: Selahedîn Seîdî
Nasnav: Têkoşer Viyan
Cih û dîroka dayîkbûnê: 1984-Bane
Dîroka tevilbûnê: 2007
