Di fermana 2014’an de, Girzerik yek ji wan gundan bû ku pêşengî ji berxwedana li dijî DAÎŞ’ê re kir. Ji ber vê, çeteyên DAÎŞ’ê herî zêde zirar dan Girzerik, piraniya malan wêran kirin. Piştî salan vegera gel a Girzerik destpê kiriye, Rêveberiya Xweser a Şengalê jî ji bo pêşwazîkirina pêdiviyên gel û xizmetgûzariyê beriya niha bi demekê xebatên Şarderiya Gel a Girzerik da destpêkirin. Lê ev saziya ku ji bo xizmeta gel hate avakirin niha ji aliyê hêzên polîsên Iraqê ve hatiye dagirkirin û rê nayê dayîn ku ev cih ji bo xizmeta gel were bikaranîn.
Li gor agahiyên ku hatine bidestxistin, ev hêz bêyî ku ti belge an jî hincetekê bidin nîşandan, dema karkerên şaredariyê di betlaneyê de bûn, hêza xwe birine wir û bicih kirine. Ji bo ku mijar were famkirin, gelek hewldan ji aliyê Rêveberiya Xweser a Şengalê û rayedarên şaredariyê ve hatine kirin, lê tenê polîsan gotiye ku biryarek ji wan re hatiye dayîn ku li wir bicih bibin.
Hêjayî bîrxistinê ye ku di 10’ê Adara 2025’an de, Rêveberiya Xweseriya Şengalê li gundê Girzêrik, ku girêdayî nahiya Til Izêr e, avahiya şaredariyê vekiribû, ji bo xizmeta gelê herêmê bike û karibe pêwîstiyên malbatên nû vegeriyane wir bicih bîne.
