Rojnamevan Demhat Tolhildan û Ozgur Avzem rêveçûna hevdîtinên navbera Şam-Rojava, guherîna hevsengiyên leşkerî yên li qadê, rêxistiniya DAÎŞ’ê ya li nava HTŞ’ê, dorpêça li ser Kobanê û bûyerên dawî yên li Rojava ji ANF’ê re nirxandin.
Rojnamevan Demhat Tolhildan anî ziman ku di navbera HTŞ û DAÎŞ’ê de şikestineke cidî heye, gelek komên DAÎŞ’ê li herêmên cuda civîn lidar xistin. Rojnamevan Demhat Tohildan jî got, “Êrişên ku 6’ê Çileyê li Helebê destpê kirin nîşan didin ku şerê li ser xeta Sûriye-Iraqê wê dewam bike. Tê gotin, bi hezaran endamên DAÎŞ’ê yên li nava avaniya fermî ya leşkerî ya HTŞ’ê ne dixwazin ji rêxistinê cuda bibin û xwe bi rengekî cuda bi rêxistin bikin. Tê gotin, ev kom civînên cuda lidar dixin û amadekariyên dikin ku pêleke nû ya êrişê li Sûriyeyê bidin destpêkirin.
DAÎŞ weke ku berê kir, niha jî hewl dide şaneyên xwe yên li herêmên cuda bi cih kiriye jinûve çalak bike. Van koman bi daxuyaniyan ragihandin ku bi rengekî fermî tevlî DAÎŞ’ê bûn. Heta niha qala hejmarek ji zêdeyî 15 hezar kesî tê kirin. Operasyonên rojên dawî yên QSD’ê yên li Hesekê, li hemberî vê rêxistiniya şaneyan e.”
HEVDÎTINÊN ŞAM-ROJAVA
Tolhildan têkildarî hevdîtinên navbera Şam û Rojava jî ev agahî parve kir: “Li gorî peymanê, bicihbûna leşkerî wê dewam bike. Di hevdîtinên bi Şamê re tê plankirin ku hêzên leşkerî bi taybetî li sê nuqteyên li derdora Hesekê bêne bicihkirin. Tê gotin wê li herêmên Kevkev, Wezîr û Til Benderê bêne bicihkirin, her wiha li ser rêya derketina ji Hesekê jî wê hêz hebin. Li gorî peymanê li nava bajaran jî hêzên ewlekariyê wê hebin.
Tê plankirin ku li bajarên Hesekê, Kobanê, Qamişlo û Dêrikê tûgay bêne bicihkirin; lê belê li ser hejmara tûgayan agahiyeke şênber nîne. Li herêmên weke Hol, Til Berak û Til Hemîsê jî wê Hêzên Ewlekariya Hundirîn wezîfeyê bikin. Li herêma Şedadê jî lihev hate kirin ku ti hêzeke leşkerî nebe.”
REWŞA DAWÎ YA KOBANÊ
Rojnamevan Ozgur Avzem li ser rewşa dawî û dorpêça li ser Kobanê got, “Tabloya li Kobanê li gorî demên beriya niha guhertineke mezin tê de nîne. Di nêzîkatiya hêzên ser bi hikumeta Şamê ya demkî de hinek guherîn hebe jî pêşketineke şênber nîne.
Komên ser bi Şamê dixwazin li gundên derdora Kobanê bi cih bibin, lê QSD’ê ev daxwaz qebûl nekir. Li herêma Şêxlerê lihevkirin çêbû, dihate payin ku heman lihevkirin li Çelebiyê jî bikeve meriyetê, lê belê têkildarî bicihkirina hêzên aliyan de taktîka mijûlkirinê heye. Hêzên Şamê dixwaze pêvajoyê ji demê re bihêle, bi taybetî ji bo vekişîna ji derdor û gundên Kobanê gavekê neavêje. Ji ber vê yekê jî li gelek gundan talan dewam dike.”
HEVSENGIYEKE HESAS
Bi kurtasî li herêmê tabloyeke rawestiyayî heye. Hevdîtin dewam dikin, lê belê gotin nakevin pratîkê. Ev rewş jî hem hewldanên jinûve zindîbûna DAÎŞ’ê hem jî rageşiya navbera Şam û QSD’ê dibe ser zemîneke hesas.
