Rojnamevan Hêmin Mamend li ber Dadgeha Silêmaniyê têkildarî hewldana kuştina xwe a beriya du mehan pêkhat, ji çapemeniyê re axivî.
Hêmin Mamend da diyarkirin ku PDK ew hêze ya ku rojnamevan Serdeşt Osman qetilkir û got: “PDK’ê ez ji cihê bav û bapîrên min derxistim. PDK’ê komek 10 kesî şandibû Silêmaniyê û hewl dan min qetil bikin.”
Mamend eşkere kir ku di nava wê koma 10 kesî de çar kesên sereke hene ku sê ji wan endamên hêza Zêrevanîne û parêzvanên berpirsekî PDK’ê ne, her wiha got ku PDK’ê soza tayînkirinê daye kesek ji wan.
Di dewamê de Hêmin Mamend got: “Daxwazê ji rojnamevanan, civaka navdewletî, Desteya Mafên Mirov, hikûmeta Iraqê, dadgehên navdewletî û tevayî sefaretxaneyan dikim ku çavê xwe ji vê dosyê re negirin. Ji berku ev ne doza kesekî hizbî yan jî take kesî ye. Ev doza qetilkirina rojnamevaneke.”
Yek ji endamên tîma parêzerên Hêmin Mamend, Rêzan Şêx Dilêr jî axivî û got: “Kesên ku hatine Silêmaniyê û ev êriş pêkanîne, piştre reviyane Kelarê, sê ji wan tometbaran hatin binçavkirin ku wê komê alîkarî ji wan xwestibû. Piştre ew sê kes ji aliyê dadgehê ve hatin berdan.”
Rêzan Şêx Dilêr da diyarkirin daxwaza wan ewe ku hikûmet li ser wan nivîsên ku çûne ber destê wan kar bike daku tometbarê sereke were girtin.
