Rojnamevanên Şengalê der barê kedkarên çapemeniya Azad Cîhan Bîlgîn û Nazim Daştan de ku doh di êrişa hewayî ya dewleta Tirk a dagirker de şehîd bûbûn, daxuyaniyeke nivîskî da.
Di daxuyaniya rojnamevanan de têkildarî israra rojnamevanan a di ragihandina heqîqetê de wiha hate gotin: “Bihîstina agahiya şehîdbûna her du hempîşe û hevalên me yên rojnamevan Nazim Daştan û Cîhan Bîlgîn em gelekî xemgîn û bi hêrs kirin. Her du rojnamevan jî bûn dengê şoreşa gelan a Rojava û hemû gelên zilm li wan hatiye kirin. Bi pênûs û kameraya xwe, xwedî li etîk û wijdana rojnamevaniyê derketin, karîn bi wêrekî li ser erk û wezîfeyên rojnamevaniyê de biçin, dengê berxwedêran bigihînin hemû herêmê û cîhanê. Weke hem pîşeyên wan me rastiya berxwedanê û hovîtiyê ji wan dibihîst. Ew bûn nimûneya rojnamevaniya rasteqîne û wêrek, ji me re dan nîşan ka dibin her şert û mercekî de çawa dikarin rojnamevaniyeke bi wijdan bikin.”
Di dewama daxuyaniyê de hate diyarkirin: “Li beramber hemû nûçeyên derew, manîpûlasyon û şerê taybet, şehîd Nazim Daştan û Cîhan Bîlgîn tevî şerê dijwar jî karîne bi şopandina eniyên berxwedanê ne tenê çeteyên dewleta Tirk û dewleta Tirk hemû hevkarên wan jî vala derbixin û wiha hate gotin: “Di demên şer de eger rojnamevanên xwedî pênûsa vegotina rastiyan û dilwêrek nebin, şerê taybet û nûçeyên derew ji bo bêmoralkirin û şaş agahdarkirina civakê dikevin dewrê. Li Bakur û Rojhilatê Sûriyeyê ku dibin xetereyeke mezin de ye xwestin wiha bikin. Lê herdu rojnamevanên wêrek hemû derewên wan vala derxistin, coş û rihê berxwedanê ya şervanan gihandin me tevan. Ew ji bo me bûn mînak, lewma dewleta Tirk wan bi qestî hedef girt. Lê wan nîşanî me da ka em çawa dikarin bidin dengê gelê xwe, hemû gelên azadîxwaz û berxwedêran.”
Di dewama daxuyaniyê de hate gotin, rojnamevan Cîhan Bîlgîn ku timî bûye dengê şoreşa gelan û şoreşa jinan a Rojavayê Kurdistanê, Nazim Daştan jî di serî de li Şengalê di şopandina berxwedana dijî DAIŞ’ê ya li Şengal û Rojava de roleke mezin lîstiye û wiha dewam kir: “Rojnamevan Nazim Daştan rojnamevanê gihandina dengê hemû gelên dibin şûrê qirkirinê de bû. Ne tenê li Rojava li Şengalê jî karî êş û berxwedana civaka me ya Êzidî ji bo cîhanê ragihîne. Bi pênûs û kameraya xwe berxwedana dijî DAIŞ’ê û hevkarên wê şopand, şahidiya kêliyên dîrokî kir. Ew jî weke Nûjiyan Erhanan karî bingehê ragihandinê û çawa rojnamevanî tê kirin ji me re deyne. Şopdara Gurbetellî Ersoz Cîhan Bîlgen jî 8 salan benavber şahidî ji tekoşîna jinan re, ji êş, koçberî û lehengiya wan re kir û pêşketina şoreşa jin ku, bûye îlham ji hemû jinên cihanê re kêlî bi kêlî mîna bibe yek ji endama şoreşê, ji heqîqeta wê re bû pênûs û dengê vegotinê. Niha em li ser şopa wan dikarin bibin dengê gelê xwe, mîraseke dewlemend a rojnamevaniyê ji me re hiştiye.”
Di beşeke din a daxuyaniyê de jî bang li saziyên navneteweyî yên rojnamevanan hat kirin û wiha hat gotin: “Divê hemû saziyên parastina mafên rojnamevanan û hemû rojnamevanên xwedî wijdan, li dijî van sûcên şer ên rejîma Erdogan û çeteyên wê derbikevin. Dewleta Tirk bi balafirên xwe di nava salê de 5 hevalên me yên rojnamevan li Bakur, Başûr û Şengalê şehîd xistin û çend hevalên me jî birîndar kirin. Bang li van saziyên navneteweyî û rêxistinên mafên mirovan dikin, erkên xwe bicîh bînin, pêşî li xeterî û hedefgirtina rojnamevanan li Kurdistanê û herêmê bigirin. Dema em erkên xwe bicîh tînin, divê ev sazî jî erkên xwe bicîh bînin, pêşî liv an dewlet û komên çete bigirin ku rasterast rojnamevanan hedef digirin.”
Daxuyaniya nivîskî ya rojnamevanên Şengalê wiha bi dawî bû: “Wê ala her du rojnamevanan a ragihandina heqîqetê her li ba be û ti carî danekeve. Wê ezmûn, wêrekî û rihê wan ê welatparêz timî ji bo me rojnamevanan û kedkarên ragihandinê bibe hêz, vîn û moral. Em ê bi bîranîna wan rojnamevaniya heqîqetê çawa tê kirin fêr bibin û fêr bikin. Dibêjin rihê we şad be û çavê we bila li piştê nemîne.”
