Nihat Şahîn ê ku piştî 30 sal û 6 mehan ji girtîgehê hat berdan, îro li bajarê xwe yê Rihayê bi girseyî hat pêşwazîkirin. Şahîn li Balafirgeha GAP’ê ji aliyê malbat, nûnerên saziyan û parlamenterê Rihayê Ferît Şenyaşar ve bi gul û dirûşmeyan hat pêşwazîkirin.
Şahîn li ber balafirgehê axivî. Şahîn bal kişand ser binpêkirinên mafên mirovan ên li girtîgehan û got, “Gelek hevalên me hîn jî li girtî ne. Tevî pêvajoya aştî û demokrasiyê ya ku bi înîsiyatîfa Rêber Apo hatiye destpêkirin jî ev polîtîka berdewam dikin. Ev pêvajo li ser aştî û xwişk-biratiya gelan e. Ji ber vê yekê, em daxwaz dikin ku tevî girtiyên nexweş hemû hevalên me bên berdan.”
‘DEMA AZADIYA GELÊ KURD E’
Şahîn derbarê Pêvajoya Aştî û Civaka Demokratîk de jî ev tişt anî ziman: “Niha pêvajoyek heye û bi înîsiyatîfa Rêber Apo tê meşandin. Em baweriya xwe bi Rêberê xwe tînin. Em bawer dikin ku ev pêvajo wê veguhere aştiyê. Wê aştiyê bîne gelên Rojhilata Navîn. Gelê Kurd wê bigihêje nasname, çand û zimanê xwe. Niha dema azadiya gelê Kurd e.”
Piştî pêşwaziyê, Şahîn bi karwanekê re ber bi bajarê xwe yê jidayik bûye Pirsûsê ve bi rê ket. Şahîn li Pirsûsê jî bi girseyî hat pêşwazîkirin.
DERBARÊ NÎHAT ŞAHÎN DE
Şahîn di sala 1995’an de li Amedê hat binçavkirin û paşê hate girtin. Dadgeha Ewlehiya Dewletê (DGM) cezayê muebetê li Şahîn birî. Şahîn li girtîgehên Amed, Gîresun, Semsûr, Karabuk, Osmaniye û herî dawî li Tekirdagê hat girtin.
