Sekreterê Partiya Çep a Kurdî ya li Sûriyeyê Salih Gedo têkildarî lihevkirina di navbera Hêzên Sûriyeya Demokratîk (QSD) û hikumeta demkî ya Şamê de ji ajansa ANHA re axivî.
Salih Gedo diyar kir ku ew gaveke yekemîn e û baş e. Salih Gedo got: “Ew gaveke bi aliyê çareserkirineke bi temamî ve ye. Ev gav ji ber bandora sekna şervan û gelê me çêbû. Her wiha bi piştgiriya hêzên Kurdistanê û gelê Kurdistanê yê Ewropa û hemû cîhanê çêbû.”
Salih Gedo diyar kir ku ew hêvîdar in di pêşerojê de ev mesele bi awayê avakirina Sûriyeyeke nenavendî bi temamî çareser bibe û mafê gelê Kurd di destûrê de bê parastin.
Salih Gedo diyar kir ku ew ê her tim piştgiriya hêzên YPG û YPJ’ê bikin û axaftina xwe wiha dawî kir: “Ji bo avakirina welatekî nenavendî ku tê de mafê gelê xwe biparêze, yekrêziya gelê Kurd em ê xebatên xwe bigihînin asteke bilindtir.”
