Yekîneyên Parastina Jinê (YPJ), bi dirûşmeya “Artêşbûna jinê misogeriya jiyana azad e” li Hola Serdem a Bajarê Hesekê ya Kantona Cizîrê ya herêma Bakur û Rojhilatê Sûriyeyê salvegera damezrandina xwe û rojbûna Rêber Apo, bi merasîmeke leşkerî û lidarxistina şahiyê pîroz kir.
Di merasîm û şahiya ku hat lidar xistin de fermandar û şervanên YPJ’ê û saziyên jinan ên li bajêr tevlî bûn. Qada şahiyê bi wêneyên Rêber Apo, pakrewanên jin û alên Yekîneyên Parastina Jin hatin xemilandin.
Çalakî bi merasîma leşkerî ya YPJ’ê destpê kir û deqeyek rêz hat girtin. Piştre Fermendara YPJ’ê Newroz Ehmed axivî.
Newroz Ehmed, ev şahî li Rêber Apo û hemû şervanên YPJ’ê pîroz kir û wiha got, “Bi saya fikr û ramanên Rêber Apo a ku pêşkêşî jinan kiriye, em hêzên xwe ava dikin. Yekem car li cîhanê tevahî û bi taybet li Rojhilata Navîn YPJ’ê dibe artêşbûn û hêza jinê. YPJ’ê bi hêz, berxwedan û têkoşîna xwe li hember terora DAÎŞ’ê şer kir û ew têk bir. Îro berxwedana YPJ’ê li pira Qereqozaq û bendava Tişrînê jî carek din nîşanî dinyayê dide ku tu hêz bi îradeya jina azad nikare. Ew bi hemû hêz û îradeya xwe li dijî dagirkeran şer dike. YPJ’ê bûye nasnameya hemû jinên têkoşer û berxwedêr. Em ê bi hêz û têkoşîna xwe Rêber Apo bi awayê fîzîkî azad bikin û xwedî li banga dîrokî ya Aştî û Civaka Demokratîk derkevin.”
Şahî jî bi stranên koma Şehîd Hêva ya Tevgera Hîlala Zêrîn a Kantona Efrînê dest pêkir. Piştre Koma govendê ya Şehîd Arjîn û Şehîd Zîlan ên şervanên YPJ’ê jî, bi govendên xwe şahî pîroz kirin.
Ji gelek welatan pîrozbahî ji bo salvegera 12’emîn a damezrandina Yekîneyên Parastina Jin (YPJ) hatin şandin û ev hêz li hemû jinan pîroz kirin.
Hunermend Yesmîn Esker bi stranên xwe salvegera damezrandian YPJ’ê û Rojbûna Rêber Apo pîroz kir.
Şahî bi gerandina govendên gelêrî bi dawî bû.
