Di çarçoveya pêşxistina têkiliyan û girîngîdayîna sekna li kêleka Kurdên Rojava û piştevaniya têkoşîn û destkeftiyên wan nexasim li gel pêşdeçûnên heyî de, îro şandeyek ji Başûrê Kurdistanê gihişt Rojava.
Şande ji Seroka Weqfa VIM Lava Hîkmet Mihemed, şêwirmendên Weqfê Nazdar Mihemed Seîd û Hogir Cafer, endamên Weqfê Cemîl û Karawan Kakil Mihemed, Zana Elî Nûrî, Hawkar Cafer, Hawbeş Dara Mihemed, Mîran Mihemed Mehmûd, Daban Ebû Bekir Omer û Biryar Ebû Bekir Ebîr pêk hat.
Nûnerên ji Kongra Star, meclis, deste û tevgerên jinan li Rojava bi şandeyê re bûn.
Şandeyê bi sedana Pakrewangeha Şehîd Delîl Saroxan a bajarê Qamişloyê dest bi gera xwe kir. Endam û rêveberên Meclisa Malbatên Şehîdan ew pêşwazî kir.
Şandeyê di nava gorên şervanên YPJ, YPG û QSDˊê de yên ku di têkbirina çeteyên DAÎŞˊê û êrişên li dijî dewleta Tirk a dagirker de şehîd bûbûn, geriya.
Li şehîdgehê, hevserokê Meclisa Malbatên Şehîdan Rêzan Gulo bixêrhatina şandeyê kir û girîngî da hevgirtina gelê kurd di vê qonaxa çarenûsî û dîrokî de.
Gulo helwestên yekitî û hevgirtinê yên gelê Kurd di parastina Şengal, Kerkûk û Kobanê de silav kirin.
