Tevgera Jinên Azad (TJA) bi dirûşma “Bi hêvî ber bi azadiyê ve dimeşin” ji Amedê ber bi Enqereyê dest bi meşê kiribû. Di roja çaremîn a meşê de jin gihîştin Edeneyê. Meş ji Kolana Ahmet Cevdet Yag bi pankarta “Bi hêvî ber bi azadiyê dimeşin” dest pê kir û bi dirûşmên “Jin jiyan azadî”, “Bijî Serok Apo”, “Jin jiyan azadî, azad bike Rêbertî”, “Şer na, aştî niha”, “Hêvî maf e, nayê astengkirin”, “Mîmarê aştiyê li Îmraliyê ye” û “Bê Serok jiyan nabe” dewam kir.
Bi sedan kesan bi gul û meşaleyan meşvan pêşwazî kirin. Gelê li ser ban û balkonên xaniyan bi nîşaneya serkeftinê û dirûşma “Bijî Serok Apo” piştgirî dan meşvanan.
Paşê girse ber bi Xaçerêya Karasû ya li Taxa Daglıoğlu meşiya. Di dema meşê de posterên Rêber Apo hatin vekirin. Meşvanên ku gihîştin Xaçerêya Karasû, li vir bi gel re hevdîtinek pêk anîn. Bi stranên Kurdî bi sedan kes ketin govendê û dirûşma “Bijî Serok Apo” berz kirin.
‘JI BO AZADIYÊ DIMEŞIN’
Hevşaredara Bajarê Mezin a Mêrdînê Devrim Demir, bal kişand ser meşa wan a bi dirûşma “Bi hêvî ber bi azadiyê dimeşin” û got: “Ev meş, meşa yekîtî, azadî û ruhê azad e.” Demir, bi bîrxistina banga Rêber Apo ya 27’ê Sibatê ya ji bo “Aştî û Civaka Demokratîk” hêvî kir ku ev pêvajo bi ser bikeve.
Demir, anî ziman ku ji bo azadiya Rêber Apo û hemû girtiyên siyasî, rakirina astengiyên li pêşiya ziman û dabînkirina aştiyê divê dewlet gaveke erênî biavêje û destnîşan kir ku dewlet hê jî ti gavên erênî neavêtiye. Wê bang li dewletê kir ku ji bo aştiyê bi lez û bez gavan biavêje.
Demir, her wisa bibîr xist ku îro salvegera qetilkirina Nagihan Akarsel e û got ku ew ê têkoşîna wê mezin bikin.
‘MEŞA ME JI BO RÛMETA MIROVAHIYÊ YE’
Parlamentera DEM Partiyê ya Amedê Adalet Kaya jî diyar kir ku meşa jinê ne tenê meşek e, di heman demê de “lêgerîna rastî û azadiyê” ye.
Kaya, anî ziman ku armanca meşê mezinkirina hêvî û daxwaza çareseriya demokratîk e û wiha axivî: “Çar roj in em ji Amedê dimeşin. Ev meş ne tenê meşa fizîkî ye; em hêviyekê, bangekê mezin dikin. Ev meşa rastî û azadiyê ye. Em jin bi vê armancê, bi vê hesretê vê meşê dikin. Armanca têkoşîna me ev e. Aştiya mayînde, pêşketina têkoşîna demokratîk bi dabînkirina şertên azadiya fizîkî ya Abdullah Ocalan pêkan e. Em dixwazin girîngiya hevdîtinên demokratîk ji hemû jinên li Kurdistan û Tirkiyeyê re ragihînin. Meşa me ji bo mafê hêviyê ye. Li girtîgehên Tirkiyeyê mafê hêviyê yê bi hezaran girtiyan tê binpêkirin. Mafê hêviyê mafê herî bingehîn ê mirovahiyê ye. Qedexekirina ramana azadiyê li ser mirovan, nemirovane ye. Ji ber vê yekê meşa me ji bo rûmeta mirovahiyê ye.”
