Li dijî êrişên dewleta Tirk a dagirker û çeteyên HTŞ û DAIŞ’ê yên li ser bajarên Rojava, seferberiya gel a li Qamişloyê didome. Di çarçoveya banga seferberiya giştî ya ku Rêveberiya Xweser îlan kiriye de, li bajêr gelê ji 7 salî heta 70 salî bi ruhê şerê gel ê şoreşgerî li kolan û taxan nobetê digirin û bajarê xwe diparêzin.
Li Qamişloyê gel li dijî êrişan çek hildan û di taxan û navenda bajêr de cihê xwe di parastinê de girtin. Apê kalemêr ku diyar kir ew endamê Komuna Şehîd Şiyar e û di parastinê de cih digire, destnîşan kir ku heta serkeftinê ew ê ranewestin û dest ji têkoşînê bernedin.
Endamê komunê got: “Em ê heta dawiyê parastina xwe bikin. Heta ku em bigihîjin serkeftinê bêhnvedan û xew ji me re tune ye. Em ê dijminê barbar ê ku tê ser me têk bibin. Bila kes xeyal neke ku Kurdê birevin an jî tune bibin. Kurd di parastinê de ne û dê bi ser bikevin.”
Her wiha endamê komunê diyar kir ku jin, zarok û kal û pîr jî di pêvajoya parastinê de cih digirin; gel û şervan bi hev re welat diparêzin û bi van gotinan biryardariya xwe anî ziman: “Em ê heta dilopa dawî ya xwîna xwe li ber xwe bidin û bi ser bikevin.”
