Di Pêvajoya Aştî û Civaka Demokratîk de desthilatdarî têkildarî sererastkirinên qanûnî û siyasî gavên şênber naavêje, ev yek têkildarî siberoja pêvajoyê nîqaş û fikaran zêde dike.
Parlamentera DEM Partiyê Sabahat Erdogan Saritaş qonaxa niha ya Pêvajoya Aştî û Civaka Demokratîk, berpirsyariyên desthilatdariyê û gavên divê bên avêtin ji ajansa me re nirxand.
‘DIVÊ BIRYARA MGK’Ê DEMILDEST WERE DERBASKIRIN’
Sabahat Saritaş got, dewletê pêvajo girêdayî mekanîzmayên biryara îdarî û ewlekariyê kiriye û diyar kir ku biryara Desteya Ewlekariyê ya Millî (MGK) divê li pêşiya pêşketiya pêvajoyê nebe asteng.
Sabahat Saritaş destnîşan kir ku divê biryara MGK’ê demildest were derbaskirin û got, “Di daxuyaniyên Tevgera Azadiyê ya Kurd de hate ragihandin ku çêkera rêxistinî hatiye fesixkirin, çek hatine îmhakirin û hêzên çekdar ên li ser sînorê Tirkiyeyê vekişiyane. Di van daxuyaniyan de hatiye destnîşankirin ku têkoşîna çekdarî ya li dijî Tirkiyeyê hatiye bidawîkirin û wê xeta têkoşîna siyasî ya demokratîk were esasgirtin.
Piştî van biryaran hemûyan, dewlet divê berpirsyariya xwe bi cih bîne, şert û mercên hiqûqî û siyasî yên pêvajoyê zelal bike, mekanîzmayên ji bo pratîkê bixe meriyetê û ji bo derbasbûna qonaxa nû biryarên şênber bide.”
‘TEVGERA AZADIYÊ YA KURD GAVÊN XWE AVÊT’
Sabahat bilêv kir ku Tevgera Azadiyê ya Kurd ji destpêka pêvajoyê ve gavên ku jê berpirsyar avêt û got, “Rêveberiya Tevgerê ji paradîgmaya Birêz Abdullah Ocalan û hêza wî ya çareseriyê bawer kir û biryarên xwe di nava demek kurt de bi cih anî.”
Sabahat Erdogan Saritaş diyar kir ku di pêvajoyên aştiyê de bawerî tenê bi daxuyaniyan nayê parastin, peyamên hatine dayîn divê bi pêkanînên şênber bên destekkirin û ragihand ku ji bo siberoja pêvajoyê divê gavên hiqûqî û siyasî demildest bên avêtin.
Sabahat Erdogan Saritaş îfade kir ku ji bo pêvajo li ser zemînekî siyasî û hiqûqî pêş bikeve, divê rol û statuya Rêber Apo bi eşkere were naskirin û destnîşan kir ku divê ji rayedarên dewletê heta partiyên siyasî, ji medyayê heta rêxistinên civakî yên sivîl her kes nêzîkatiyeke li gorî aştî û çareseriyê raber bike.
