Cîgirê Fermandariya Giştî ya Hêzên Ewlekariya Hundirîn li Parêzgeha Hesekê Mehmûd Xelîl der barê serdana şandeya parêzgeha Hesekê bo Şamê daxuyanî dan.
Daxuyanî wiha ye:
“Di çarçoveya vexwendineke fermî ji hêla birêz serok de, me digel Parêzgarê Hesekê Birêz Nûredîn Ehmed, û Fermandarê Hêzên Ewlekariya Hundirîn li Parêzgeha Hesekê, Merwan El Elî, serdana peytex Şamê kir û bi hev re li Qesra El Şab û bi beşdriya şandeyên ji hemû beşên civakê, meşeleya Newrozê vêxist û hevdû pîroz kir.
Piştî vê yekê, civînek taybet bi Serok Ehmed El Şaraa re hat lidarxistin. Di wê civînê de gelek mijarên girîng hatin gotûbêjkirin, bi taybetî mijara dîlgirtiyan û vegera koçberan bo bajarên Efrîn, Serê Kaniyê û deverên din.
Di civînê de, bal hat kişandin ser girîngiya bicîhanîna hemû bendên peymana 29`ê Çileyê, ji ber ku ew di vê qonaxê de di nav pêşîniyên me yên sereke de ye. Bi fermana Serok Ehmed El Şaraa, komîteyek taybet ji bo şopandina van mijaran hate damezrandin, bi armanca pêşxistina mekanîzmayên zelal ji bo çareserkirina pirsgirêkan û xurtkirina pêvajoya aramiyê li welêt.”
