Ghebreyesus li ser X’ê daxuyanî da û diyar kir ku li bajarê Al Deainê yê li rojhilatê welêt, di êrişa li ser nexweşxaneya perwerdeyê de herî kêm 64 kesan jiyana xwe ji dest dan. Ji kesên jiyana xwe ji dest dan 13 jê zarok, 2 hemşîre û yek doktor bû.
Hate ragihandin ku di encama êrişê de 89 kes jî birîndar bûn ku 8 ji wan kedkarên tenduristiyê bûn. Ji ber êrişê xisareke mezin a beşên zarokan, jidayikbûnê û servîsa lezgîn a nexweşxaneyê bû. Nexweşxane ji ber êrişê bi temamî bêkêr bû.
Li gorî daneyên WHO’yê, li Sûdanê di şerê sê salên dawî de 213 caran êriş li ser navendên tenduristiyê hate kirin. Di van êrişan de jî bi giştî 2 hezar û 36 kes hatin kuştin. Her wiha 720 kes jî birîndar bûn.
Dîrektorê Giştî yê WHO’yê Ghebreyesus ji bo kêmkirina şerê li Sûdanê bang kir û destnîşan kir ku divê sivîl, xebatkarên tenduristiyê û wezîfedarên alîkariya mirovî bêne parastin.
Ghebreyesus got, “Divê xizmetên tenduristiyê ti carî nebe hedef. Aştî dermanê herî baş e.”
Li Sûdanê di şerê navxweyî de ku nêzî 3 sal in dewam dike, bi deh hezaran kesî jiyana xwe ji dest dan, zêdeyî 11 milyon mirov jî koçber bûn. Neteweyên Yekbûyî rewşa li Sûdanê weke “krîza herî mezin a mirovî ya li cîhanê” pênase dike.
