Rêxistina Tora Mafê Mirovan a Kurdistanê ragihand ku di nava sê rojên bihurî de 10 welatî û çalakvanên Kurd li Rojhilatê Kurdistanê hatine binçavkirin û çarenûsa wan hîna nayê zanîn.
Hate diyarkirin ku di 7’ê Cotmeha îsal de 4 ciwanên Kurd Rêbwar Mûsewî (17), Zahîr Azerî (17), Keywan Seîdî û Fexredîn Xalîdî li bajarokê Şino ya ser bi bajarê Urmiyeya Rojhilatê Kurdistanê bêyî fermana dadwer ji aliyê hêzên dewleta Îranê ve hatin binçavkirin. Piştî çend saet lêpirsîn hate kirin, Rêbwar Musewî û Zahîr Azerî hatin berdan, lê çarenûsa Keywan Seîdî û Fexredîn Xalîdî hîna nediyare.
Rêxistinê destnîşan kir ku di heman rojê de du welatiyên din ên Kurd Kameran Sultanî yê ji Bokan a Rojhilatê Kurdistanê û Hesen Mîhrabî yê ji gundê Nê yê ser bi bajarê Merîwan a Rojhilatê Kurdistanê bêyî fermana dadwer ji aliyê hêzên ser bi Îranê ve hatin binçavkirin.
Li gorî heman agahiyan, du çalakvanên Kurd Muhsîn Gerdişî û Hisên Gerdişî ku birayên hev in û girtiyên siyasî yên berê ne, li bajarê Bokan ê Rojhilatê Kurdistanê bêyî fermana dadwer bi karanîna tundiyê hatin binçavkirin û rêkirin girtîgeha Ûrmiyeyê ye.
Her wiha Rêxistinê da zanîn ku roja 8’ê Cotmeha îsal, xwendekarê Kurd ê bi navê Mubîn Talebanî yê ji bajarê Merîwan a Rojhilatê Kurdistanê, bêyî fermana dadwer ji aliyê hêzên ser bi dewleta Îranê ve hate binçavkirin û ber bi cihek nediyar ve hate birin.
Rêxistina Tora Mafê Mirovan a Kurdistanê ragihand ku di 11’ê Cotmehê de jî Efşîn Îbrahîm yê 27 salî û ji bajarê Mihabad a Rojhilatê Kurdistanê ji aliyê hêzên îdareya Îtlaatê ya bajar ve bêyî fermana dadwer hate binçavkirin û ber bi cihek nediyar ve hate birin.
