Komîteya Koçberên Herêmên Şehbayê daxuyaniyeke nivîskî weşand. Komîteyê di daxuyaniyê de girtina sivîlan li Şehba û li bajarokên Til Eran û Til Haselê şermezar kirin û got: “Girtinên ku ji aliyê komên çekdar ên ku ji aliyê Tirkiyeyê ve tên piştgirîkirin, bi agahdariya dezgehên ewlehiyê yên hikumeta veguhêz pêk tên, êdî ne bûyerên tekane ne, lê bûne şêweyekî sîstematîk ku armanc dike niştecihên herêmê bitirsîne û zorê bide wan da ku ji cih û warên xwe yên resen koçber bibin.”
Di dewama daxuyaniyê de îşaret pê hat kirin ku şêniyên herêma Şehbayê ji salan ve tên girtin, bi darê zorê tên windakirin û îşkence li wan tê kirin. Her wiha hate destnîşankirin ku tevî guhertinên siyasî û meydanî yên li welat çêbûne, lê polîtîkayên çewisandin û cudakariyê li dijî Kurdan dewam dikin. Di daxuyaniyê de hate gotin, li hemberî van siyasetan hêzên navneteweyî bê deng in û hesab nayê pirsîn.
Komîteyê di daxuyaniyê de da zanîn ku herêma Şehbayê bûye qada vekirî ya binpêkirinan û wiha lê zêde kir: “Şênî bi zorê tên koçberkirin, milkên wan tên desteserkirin, demgorafiya herêmê bi awayekî sîstematîk tê kirin.”
Komîteyê daxuyand ku hikumeta veguhêz a Sûriyeyê û çeteyên dewleta Tirk a dagirker berpirsên van binpêkirinan û banga rawestandina binpêkirinan û serbestberdana sivîlên revandî hat kirin. Her wiha bang li Neteweyên Yekbûyî, rêxistinên hiqûqî yên navneteweyî hat kirin bi lez zextê li Enqereyê bikin, bila kiryarên xwe rawestîne û jiyana sivîlan were parastin.
Komîteyê banga pêkanîna benda 5’an anku vegera ewle ya koçberan a peymana 10’ê Adarê kir û got: “Siyasetên girtin û koçberkirinê neyên rawestandin û vegera ewle û birûmet a koçberan neyên mîsogerkirin, îstiqrar li Sûriyeyê pêk nayê.”
