Fermandariya Giştî ya Yekîneyên Parastina Jin (YPJ) der barê şehadeta 5 şervanan de daxuyaniyek weşand.
Daxuyanî YPJ’ê wiha ye:
“Rêhevalên me Nergîz Dilda Welat, Cudî Tolhildan, Axîn Koçer, Sema Hesekê û Tolhildan Serêkanîyê li Minbicê bi berxwedaniya xwe destanên Edûleyên demê nivîsandin. Dema ku çeteyên Tirkiyê êrîşên xwe yên dagirkirinê birin ser bajarê Minbicê, ev fermandar û şervanên me yên qehreman yekser bi biryardariyeke mezin berê xwe dane bajarê Minbicê. Li gel hemû êrîşên dagirkeriyê, rêhevalên me bi çalekiyên cûr be cûr li beramberî dijminê hov xwe kirin bendavek mina Tişrînê. Rêhevalên me dema ku dikevin çembera dijminê xwînxwar, ji xwe re berxwedanê ango jiyanê hildibjêrin û mîna Arîn, Avesta û Barînên serdemê xwe bi hêstên tolhildanê dipêçin û ji bo nekevin destê dijmin de, di dîroka 09.12.2024’an de her 5 rêhevalên me heya dawiyê li ber xwe didin. Rêheval Tolhildan Serêkaniyê di dema pevçûnê de şehîd dibe. Her çar hevalên din jî dema ku guleyên wan diqedin bombeyên xwe di xwe û dijmin de diteqînin.
Rêheval Tolhildan Serêkaniyê, li bajarê Serêkaniyê çavên xwe li jiyanê vekiriye û di nava malbateke welatparêz de mezin bûye. Bi taybet piştî dagirkirina Serêkaniyê, bi ruhê xwe yê welatparêziyê li beramberî kevneşopî û faşîzma dijmin bi ruhê tolgirtinê navê xwe dike Tolhildan û di sala 2020’an de berê xwe dide nava refên şoreşê. Heval Tolhildan di nava jiyanê de bi ruhê xwe yê welatperwer û fedekariya xwe dihat nasîn. Bi taybet jî difikrî û di nasnameya azadiya jin de xwe kûr kiribû. Di warê rexistinî de hevalekî xwedî danehev bû. Komkujiya ku li ser gel hatiye meşandin re şahîdî kiribû ji bo vê dinaskirina rastiya dijmin de pir kûr bû. Di têkilîyên xwe yên rêhevaltî de xwedî bandor bû, ji bo vê jî di nava hevrêyên xwe de pir dihat heskirin. Di nava şoreşê de hem wek şervan hem jî wek fermandar kedeke xwe yê mezin çêbû. Heval Tolhildan herî dawî di fermandariya Konseya Leşkerî ya YPJ’ê de cihê xwe digirt û heya kêliya dawî erk û berpirsyartiyên xwe rast pêk anî.
Rêhevala me Nergîz Dilda Welat li Kobanê ji dayik dibe. Di sala 2015’an de bi hêstên serkeftinê re tevlî nava refên azadiyê dibe. Di demekî kurt de fêrî jiyana şoreşgerî dibe. Bi xwastek û heskirin di çekên giran û suîqestê de xwe pispor dike. Dema ku dixwaze xwe bigihîne xwebûna jin û jiyana azad û zêdetir nas bike perwerdeya bîrdozî ji xwe re bingeh digre. Pir zû fêrî kar û xebatên şoreşê dibe. Di gelek qadên herêma Cizîrê û herêma Firatê de erk hildide ser milên xwe. Ew bê dudilî di hemû sengeran de cihê xwe digre û mîna şervan û fermandarekî şerê nûjen her tim bi erka xwe radibe.
Rêhevala me Cudî Tolhildan ji pêkhateya gelê me yê Ereb bû. Li Reqayê ji dayik dibe û di sala 2022’an de tevlî nava refên YPJ dibe. Rêheval Cudî ji nêz şahidî jî tarîti û hişmendiya ku DAÎŞ’ê bi taybetî li ser jin û civakê daye meşandin, kiriye. Bi evîna jiyaneke azad û bi wate avakirin re bi biryardariyek mezin ji hemû kar û xebatan re tevlîbûna xwe ji dil çêdikir. Ji xwe rêheval Cudî beriya tevlî nav refên YPJ’ê bibe jî di gelek kar û xebatên şoreşê de cih digirt. Bi zanebûna xwe xwedî seknekî leşkerî û bîrdozî bû. Di naskirina hebûna jin de kûrbûnek di xwe de dabû avakirin. Di jiyanê de bi pêşengtiya xwe û hevaltiya xwe ya germ dihat naskirin.
Rêhevala me Axîn Koçer li Serêkaniyê ji dayik bûye û di nav malbateke welatparêz de mezin bûye. 2 birayên rêhevala me jî tevlî refên azadiyê dibin û digihêjin mertebeya şehadetê. Rêhevala me ji ber bandora çanda malbatê ya welatparêz, bandorbûna şehadeta birayên xwe bi xeyala Rêberek û welatek azad, berê xwe dide nav refên YPJ. Beriya ku tevlî nava refên YPJ bibe ji destpêka şoreşê de cihê xwe di nav kar û xebatên şoreşê de digirt. Hevaleke xwedî rêgezên azadiyê bû. Bi sekna xwe ya di jiyanê de ji aliyê aliyê gel û rêhevalên xwe ve pir dihat hezkirin. Di nav jiyanê de bi jêhatîbûna xwe dihat nasîn. Hem di qadên şerde hem jî di qadên xebat de wek fermandareke demê bi erka xwe rabû.
Şervana me Sema Hesekê jî, li bajarê Hesekê ji dayik dibe. Ji bo ew jî bibe temînata Şoreşa Rojava di sala 2023’an de tevlî nav refên YPJ dibe. Kesayeta wê xwedî enerjiyekî herikbar bû. Di nav tabûrên Komandos de hertim bû xwedî seknekî leşkerî û bîrdozî. Bi heskirina xwe ya ji welat re xwedî vê jiyana bi wate derdikeve. Xwedî seknekî cewherî bû û bi disîplîna xwe dihat naskirin. Bi coş û kelecana xwe bi biryardariya xwe ya şareza re her tim dibû şewqa jiyana azad.
Mirateya ku van her pênc şehîdên me lê xwedî derketin e, ji bo me jî armanca bilindkirina têkoşînê ye. Şehîdên me bi ruhê xwe yê fedayiyane bûn temînata şoreşa gelan. Ruxmê hemû êrîşên dagirkerîye bê tereddût heya dawiyê xwedî li doza xwe derketîn. Heya ku em xeyalên şehîdên xwe pêk bînin, em ê bê rawastandin têbikoşîn.
Em ji bo tevahî gelê xwe yê azadîxwaz ku ji bo parastina destkeftiyên şoreşê û rûmeta neteweyî li ber xwe didin, bi taybet jî malbatên qedirbilind û hêja yên hevrêyên xwe Nergîz Dilda Welat, Tolhildan Serêkani,Cudî Tolhildan, Axin Koçer û Sema Hesekê re sersaxiyê dixwazin. Weke Yekîneyên Parastin Jin (YPJ), em ê herdem li ser şopa şehîdên xwe bin heta ku xeyalên lehengên welatê me bibin rasteqîn û azadiya welat mîsoger bibe.“
Nasnameyên şehîdan wiha ne:
Nav û Paşnav: Edla Ehmed
Nasnav: Nergiz Dilda Welat
Navê Dayik: Emine
Navê Bav: Mihemed
Cîh û Dîroka Şahadetê: 09.12.2024/Minbic
****
Nav û Paşnav: Sozdar Mihemed Ebdullah
Nasnav: Tolhildan Serêkanî
Navê Dayik: Gulê
Navê Bav: Mihemed
Cih û Dîroka Şahadetê: 09.12.2024/Minbic
****
Nav û Paşnav: Kefe Mihemed Casim
Nasnav: Cudî Tolhildan
Navê Dayik: Zehra
Navê Bav: Mihemed
Cih û Dîroka Şahadetê: 09.12.2024/Minbic
****
Nav û Paşnav: Rozîv Cuma Mihemed Lo
Nasnav: Axîn Koçer
Navê Dayik: Emşe
Navê Bav: Cuma
Cih û Dîroka Şahadetê: 09.12.2024/Minbic
****
Nav û Paşnav: Rama Xelîl Xelil
Nasnav: Sema Hesekê
Navê Dayik: Rojîn
Navê Bav: Xelîl
Cih û Dîroka Şahadetê: 09.12.2024/Minbic
