Şêniyên Wargeha Penaberan a Şehîd Rustem Cûdî (Mexmûr) ji bo parastina rûmeta xwe ji ber êriş û zextên dewleta Tirk ji gund û warên xwe derketibûn, bi gelek zorî û zehmetiyan re rû bi rû man, her wiha gelek war guhertin heta gihiştin Wargeha Mexmûrê. Li vê derê jî bi dehan car êrişên hewayî û bejayî li ser şêniyên Mexmûrê hatin pêkanîn. Lê rûxmê hemû êriş, zorî û zehmetiyan jî xelkê wargehê dest ji berxwedan, rûmet û têkoşîna xwe bernedan. Her wiha li ser xeta Rêber Apo û şehîdan têkoşîna xwe domandine û hê jî didomînin. Xelkê wargehê her tim bi xeyal û hêviyên Rêbetiya bi awayê fîzîkî azad û welatek azad berxwedan û têkoşîna xwe didomîne.
Li ser vê yekê pêvajoya ‘Aştî û Civaka Demokratîk’ a ku ji aliyê Rêbertî ve hatî destpêkirin, heta astekê baş dimeşe. Ji bo ev pêvajo hîn baştir û bi leztir bigihije encamê, di her alî de hewldan tên kirin. Xelkê wargehê jî parçeyek ji vê têkoşînê ye. Li ser wî bingehî Rêber Apo peyamek ji xelkê Mexmûrê re şand û destnîşan kir ku ew ê di vê pêvajoyê de xwedî rolek mezin be.
Xelkê Mexmûrê li ser vê peyamê hest, kelecan û kêfxweşiya xwe ji ANF’ê re anîn ziman.
‘COŞEK MEZIN DA GELÊ WARGEHÊ’
Mamoste Mariya Bozan têkildarî peyama Rêber Apo wiha kêfxwşiya xwe anî ziman: “Ev pêvajoya ‘Aştî û Civaka Demokratîk’ ya ku hatî destpêkirin, me mereq dikir ku wê ji bo gelê wargehê jî pêvajoyek çawan bide destpêkirin, her wiha Rêbertî li ser wargehê çi difirkire, me ev agahî girt û me silavên wî yên germ jî girtin. Em jî wek gelê wargehê silavên xwe li Rêbertî dikin. Hem silav, hem jî fikirên Rêbertî yên ji bo wargehê, bi rastî jî coşek mezin da gelê wargehê. Ji ber ku ev 30 sal in em li benda agahiyek wisa bûn, li benda pêvajoyek û wextek wisa bûn, rojekê em vegerin li ser axa xwe. Ev yek hem di me de coşek mezin û hem jî hêviyên me yên ji bo welatek azad, hestekî pir giranbiha çêkir. Her çiqas pênasekirina wê zehmet be û em nikarin bînin ziman jî, lê pêşxistina vê pêvajoyê em jî bi dil û ruhekî germ pêşwazî dikin.”
‘EM DI HER ALÎ DE LI GEL RÊBERTIYA XWE NE’
Her wiha çalakvanê çalakiya nobetê Yusif Gundikî jî wiha kêfxweşiya xwe ya ji bo nameya Rêber Apo anî ziman: “Bi nameya ku Rêbertî ji bo gelê wargehê şandî, kêfxweşî û kelecanek mezin di me hemûyan de çêkir. Ev 26 sal in Rêbertî di zindanê de ye û cara destpêkê ye ku bi taybet ji bo xelkê wargehê tiştekî wisa dibêje. Em di her alî de li gel Rêbertiya xwe ne. Ev pêvajoya ku Rêbertî dayî destpêkirin, em silav dikin û serkeftinê ji Rêbertî û hemû hevalên di zindanan de dixwazin. Em Serokê xwe di nava xwe de dixwazin. Em jî silavên xwe ji bo Rêbertî dişînin.”
