Bi boneya 15`ê Gulanê Roja Zimanê Kurdî gelek mamoste, xwendekar û şagirtên dibistanê li Goristana Şehîd Dicle li hev civiyan, 15`ê Gulanê Roja Zimanê Kurdî pîroz kirin û bi daxuyaniyekê dawî li çalakiyên xwe anîn.
Daxuyanî ji aliyê Berdevka Ofîsa Çalakiyan ya Zanîngeha Kobaniyê Stêrvan Bozan ve hat xwendin.
Naveroka daxuyaniyê bi vî rengî ye:
‘’Bi boneya rasthatina 15’ê Gulanê Roja Zimanê Kurdî, em vê rojê li hemû şehid, têkoşer, xebatkar, kurdîhez û azadixwazên doza Kurdistanê ku ji bo vê dozê têkoşiyane, pîroz dikin û vê rojê diyari giyanên şehîdan dikin.
Ji ber bindestbûna gelê Kurd zimanê Kurdî jî di bin destan de ye. Dewletên desthilatdar ji bo tunekirina zimanê Kurdî û asîmilekirina gelê Kurd serî li polîtikayên cur bi cur dane.
Li Rojavayê Kurdistanê di şert û mercên herî zehmet de, bi saya azadixwaz, têkoşer û şehidên mina Viyan Amara, Egîd Cilo û Zozan Hesekê û gelek mamosteyên şehid ku di doza azadiya Kurdistanê de xwedî kedên gelekî mezin in, xebatên têkildarî pêşvebirina ziman bê navber berdewam dikin.
Îro li Rojhilata Navin û bi taybet jî li Sûriyeyê pişti hilweşîna rêjîma BAAS’ê gelek guhertin û veguhertinên mezin pêk tên ku yek ji wan ya herî dawiyê jî 12’emîn Kongreya PKK`ê û îlankirina her du şehîdên pêşeng Riza Altûn û Ali Haydar Kaytan e ku em wan rêzdarî bi bir tinin.
Ji ber van egeran ji bo ku deskeftiyên me yên şoreşê di asteke heri bilindtir rêça xwe berdewam bike û berhemên xwe yên nirxdar bibîne, pêwist e em jî weke qada perwerdehiyê ya Kantona Firatê li gori ruhê şoreşê tev bigerin û pêwist e ku mamoste, rewşenbir, xwendevan û hemû xebatkarên ziman xwe di pêşxistina zimanê Kurdî de berpirsyar bibînin.
Perwerdeya bi zimanê dayikê, mafekî rewa û bingehîn e, ku bi rasti jî isal saleke cuda ye ku divê perwerdeya bi zimanê dayikê di destûra fermî ya Sûriyeyê de were naskirin û qebûlkirin.’’
Daxuyanî bi berzkirina dirûşmeya; ‘’Bijî têkoşîna Zimanê Kurdî’’ û ‘’Zimanê Kurdî nasname û hebûna me ye’’ bi dawî bû.
