Hevgirtina Rewşenbîrên Rojavayê Kurdistanê (HRRK) bi daxuyaniyeke nivîskî êrişa li dijî xwendekarên Zanîngeha Rojava şermezar kir û banag parastina statuya zanîngehê kir.
Di daxuyaniyê de wiha hate gotin:“Em bi dilgiraniyeke mezin û ji nêz ve mijara entegrekirina saziyên perwerdehiyê di nava saziyên dewleta Sûriyeyê de, bi taybetî jî mijara Zanîngeha Rojava li Qamişloyê dişopîne. Paşguhkirin û dûrxistina mafên xwendekaran û siberoja wan a akademîk şermezar dikin.”
HRRK‘ê êrişa hêzên ewlekariyê ya li ser xwendekarên zanîngehê ku di 16`ê Mijdara 2026`an de hatibû kirin, şermezar kir û wiha domand “Tepeserkirina bi zorê ya derbirîna aştiyane tê wateya binpêkirina mafên xwendekaran û pîroziya zanîngeha wan.”
HRRK`ê xwest ku lêpirsînek serbixwe were pêkanîn û hemû kesên berpirsiyar werin darizandin.
Di dewama daxuyaniya HRRK‘ê de hate gotin: “Parastina ziman û çanda kurdî û azadiya derbirînê erkekî bingehîn e. Em teqez dikin ku entegrekirina saziyan divê bi encama diyalogê û lihevkirina di navbera aliyan de pêk were. Em her tevlîkirina bi biryarên ji jor ve û biryarên ji yek alî ve tên ferzkirin, napejirînin. Entegreya ku taybetmendiya akademîk, rêveberî û zimanî ya van saziyan têk bibe, dê bibe gefek li ser siberoja ziman û çanda kurdî li Rojava. Ev nêzîkatiya dûrxistinê, entegrekirina bi zorê, bê guman dê ji hêla hemû parêzvanên ziman, çand û hebûna Kurdî li Sûriyeyê ve, neyê pejirandin.”
HRRK‘ê di dawiya daxuyaniyê de ev bang kir:
• Biryara tevlîkirina Zanîngeha Rojava di nav Zanîngeha Firatê de were betalkirin. Zanîngeh wekî zanîngehek serbixwe di nav pergala perwerdehiya bilind a Sûriyeyê de were naskirin û hemû fakulte û beşên wê tevlî pêvajoya hevyazbariya fermî ya zanîngehê bibin .
• Naskirina bawernameyên zanîngehê û rawestandina hemû kiryarên ji bo girtina wê, yan jî veguhezîna xwendekarên wê bo zanîngehên din.
• Naskirina zimanê Kurdî wekî zimanek fermî di destûrê de û misogerkirina mafê perwerdehiya bi zimanê Kurdî û pejirandina wî wekî zimanê hînkirin û lêkolînên zanistî li Zanîngeha Rojava.
• Destpêkirina diyalogeke fermî ya bilez bi rêveberiya zanîngehê û nûnerên ku ji hêla xwendekaran bi xwe ve hatine hilbijartin re û beşdarkirina xwendekaran di biryarên ku siberona wan a akademîk û siberoja zanîngeha wan diyar dikin de.”

