Di çarçoveya çalakiyên 19’ê Gulanê de li Meclîsê bernameyek hat lidarxistin. Serokê Meclîsê Nûman Kurtulmuş di çalakiyê de axivî û got ku di şer de zêdetirî 40 hezar kesan jiyana xwe ji dest dane û got: “Bi Tirk, Kurd û hemû etnîkên xwe yên cuda em ê bi hev re weke Tirkiyeyê meşa xwe bidomînin. Em ê bi hev re Tirkiyeya bihêz ava bikin.”
DU RÊ HENE
Kurtulmuş, diyar kir ku bi taybet piştî mudaxileya DYE’yê ya li Iraqê û vir ve hema hema li tevahiya herêmê welat ji hev parçe bûn û ketin pêvajoya hilweşînê û got ku li pêşiya wan du rê heye.
Kurtulmuş got, “Iraq û Sûriye parçe bûn, Lubnan êdî nema dikare bê birêvebirin. Lîbya, Sudan, Somalî dabeş bûn. Tevahiya welatan li ser cudahiyên qebîletiyê an jî li ser cudahiya etnîk û mezhebî kirin aliyekî şer û hinek jî bi rêya rêxistinên terorê hatin parçekirin. Em jî yan dê mîna gayê zer li bendê bûna ku dor were me, yan dê parçe parçe bûbûna yan jî Tirk, Kurd û her kes dê bihata gel hev û ev projeya emperyalîstan têk bira. Em vê rêyê vedibijêrin û di vê rêyê de pêş dikevin.”
LI HEMBERÎ PROVAKASYONAN ME TEDBÎRÊN XWE GIRTINE
Kurtulmuş, diyar kir ku Tirkiye ketiye ser rêyeke girîng û got: “Armanc û daxwaza me ew e ku em vê rêyê di demekî herî kin de temam bikin û bi hev re, bi xwişk-biratî rêya xwe bidomînin. Bêguman hin kesên dibêjin ‘Bila ev mesele bi ser nekeve’ û dikevin nava fikaran, hin derdorên bûne aparatên projeyên cuda dê hewl bidin vê pêvajoyê jehrî bikin, bikevin nava provakasyonan û dê hewl bidin pêvajoyê asteng bikin. Me jî di vê çarçoveyê de hemû tedbîrên xwe girtine. Hêvîdarim ev pêvajo di demekî herî nêz de temam bibe.”
