Di hejmara Nîsanê de rê û rêbazên nirxandina banga dîrokî ya Rêber Apo ji aliyê kadro û milîtanên Têkoşîna Azadiyê ya Kurdistanê û welatparêzan hate vegotin. Di nivîsan de bersiv ji propagandaya tasfiyekirinê û bêhêvîtiyê ku bi amûrên şerê taybet tê meşandin û hate ragihandin ku rêbaz û amûrên têkoşînê bêne guhertin jî ‘Têkoşîna azadiyê ya gelê Kurd dewam dike, wê dewam bike’. Vejîna bi rabûna PKK’ê ya di dîroka Kurdistanê de, guhertina paradîgmayî û derbasbûna li qonaxeke nû û bilind hate nirxandin.
Bi wesîleya bûyîna yekemîn a Rêber Apo di 4’ê Nîsanê de peyamên jin û ciwanan hatin nirxandin. Hate destnîşankirin ku rojbûyîna Rêber Apo mîladek e. Koordînasyona KJK’ê bang kir ku bi banga dîrokî re jin hemû azad bibin, hemû rojan bikin roja azadiya jinê û got, “Dem hatiye ku em dengê xwe tevlî dengê Rêber Apo bikin.”
FÊHMKIRINA RAST A BANGÊ
Endamê Komîteya Rêveber a PKK’ê Dûran Kalkan di nivîsa xwe de diyar kir ku banga dîrokî li nava raya giştî ya hundir û derve ve bi berfirehî hate nîqaşkirin, lê belê şert e ku ev yek bi rengekî rast bê fêhmkirin. Kalkan têkildarî şerê taybet û dezenformasyona têkildarî pêvajoyê hişyarî da û got, “Yên ku beriya 40 salî bi gotina ‘terorîzm’ê û ‘kişandina gel a li nava komkujiyê’ sixêf li têkoşîna çekdarî dikirin, niha jî bi gotina ‘Çima PKK dest ji têkoşîna çekdarî berdide’ hewl didin rexne bikin.” Kalkan bal kişand ser mînakên guherîn û veguherînê yên di dîroka PKK û Kurdistanê de.
TÊGIHIŞTIN Û PEJIRANDINA RÊBERTÎ BI RENGEKÎ CIDÎ
Endama Komîteya Navendî ya PKK’ê Dilzar Dîlok di nêzîkatiya sosyalîst a pêşverû de hêza afirîner a kesayet a di nava tevgera Apoyî de nirxand. Dîlok di nivîsa xwe ya bi sernavê ‘Jiyana bi rengê sosyalîst’ de bal kişand ser avakirina sosyalîzma nû ku Rêber Apo li gel tecrîda li Îmraliyê pêk anî. Dîlok nivîsa Zeynep Kinaci (Zîlan) ji xwe re kir esas û got, milîtanên pêşeng li ser rêya azadiyê xwedî mifteya abîdebûyînê ne.
ŞÎFREYA BÛYÎNA SÊYEMÎN DEMOKRATÎKBÛN E
Endama Konseya Serokatiya Giştî ya KCK’ê Zilar Stêrk di nivîsa xwe de ‘Banga Aştî û Civaka Demokratîk’ şiband şitlekî. Zilar Stêrk diyar kir ku ji bo ev şitil şîn bide divê Rêber Apo ji aliyê jiyan û karkirinê ve xwedî şert û mercên guncaw be û got, “Şîfreya têkoşîna bûyîna rêbertî ya sêyemîn ‘demokratîkbûn’ û şîfreya çareseriyê jî ‘têkoşîna civaka demokratîk’ e. Zilar Stêrk destnîşan kir ku di wezîfeyên nû de erka pêşengiyê dikeve ser milê jinan.
KURD BI RÊXISTINÎ Û DÎNAMÎK PÊVAJOYÊ PÊŞWAZÎ DIKIN
Endama Koordînasyona KJK’ê Pîroz Nûda bûyerên siyasî yên dawî di çarçoveya Şerê Cîhanê yê 3’yemîn de nirxand û anî ziman ku Têkoşîna Azadiyê ya Kurdistanê li Rojhilata Navîn diyarker e. Pîroz Nûda diyar kir ku fesihkirin û çekdanîna PKK’ê nayê wateya bidawîbûna têkoşînê û got, “Rêber Apo biryar da. Got, ‘PKK’ê temenê xwe yê dîrokî temam kir’. Rast e, PKK wê êdî şûna xwe ji rêxistiniyên nû re bihêle. Lê belê bi guhertina rê û rêbazên me yên têkoşînê re wezîfe û berpirsyariyên me yên şoreşgerî neqediyane.”
Di hejmara meha Nîsanê ya rojnameya Serxwebûnê de beşa destpêkê ya ‘Çîroka Serdil’ a ji rojnivîskên gerîla û helbesta ‘Ez mirov bûm’ a Alî Haydar Kaytan pêşkêşî xwendevanan hate kirin.
