Soydan Akay ê piştî girtîbûna xwe ya 32 salan hate berdan, piştî derketî jî têkoşînê didomîne. Akay ê ku banga 27’ê Sibatê ya Rêber Apo li zindanê pêşwazî kir, gavên din ên dema nû û banga bi dîmen a Rêber Apo jî ji derve pêşwazî kir.
Akay diyar kir ku divê teqez manîfesto ji gel re were şîrovekirin û got, divê metnên Rêber Apo bên gihandina gel.
Di beşa duyem a hevpeyvîna me ya bi Soydan Akay re de, me li ser çavdêriya wî ya têkildarî jiderve bandora banga Rêber Apo ya li ser gel nîqaş kir.
Akay rexne kir ku çima fikrên Rêber Apo nayên gihandina gel û got, di hemû xebatan de zimanekî rêxistinê yê teng serwer e, têkildarî vê yekê divê li ser zimanê siyaseta demokratîk, hin xebat bên kirin.
Akay got, “Mijara herî esas a ku gel tîne ziman, bêbaweriya li hemberî geşedan e. Tê fêmkirin ku civînên DEM Partiyê sînordar in. Weke di destpêkê de jî min diyar kir, manîfesto bi civakê re nayê parvekirin û nîqaş nayên pêşxistin. Divê teqez manifesto ji gel re were şîrovekirin.”
Akay anî ziman ku pêvajo ji aliyê Rêber Apo ve hatiye diyarkirin, hevdîtin jî bi rêya DEM Partiyê tên meşandin, pêvajo jî li ser muzakereyan didome.
Akay ragihand ku siyaseta demokratîk wê bibe rêbazê têkoşîneke nû ya stratejîk û ev tişt got: “Rêber Apo bi mehane civakê ji dema nû ya stratejîk re amade dike. Divê em nîqaş bikin ku çawa bi siyaseta demokratîk em dikarin civaka Rojhilata Navîn rakin ser piyan. Divê em şîrove bikin ku çawa dikarin komunan ava bikin.”
Soydan Akay destnîşan kir ku divê bi siyaseta demokratîk, civaka demokratîk were avakirin û ev tişt bilêv kir: “Em dikarin azad bijîn û têkiliyên xwe bi dewleta heyî re jinûve li ser bingehê hiqûqî ava bikin. Weke sosyolojik, siyasî, ekonomîk û çandî em dikarin vê bi ser bixînin. Pêdivî bi dem, fêmkirin, sebir û têkoşînê heye.”
