Ji bo Şahabedîn Kandemîr (Kerem) ku di 22’yê Adara 1995’an de li navçeya Pilemûr a Dersimê şehîd bibû û ji bo Mehmet Emîn Akinci (Bilind) ku di 1996’an de li navçeya Azarpêrtê ya Çewligê şehîd bibû, li Mala Şînê ya Farqîniyan ya li Taxa Bagcilarê ya Rezana Amedê taziye hate danîn. Partiyên siyasî, rêxistinên civaka sivîl û gelek welatî bi pêşengtiya MEBYA-DER’ê çûn serdana taziyeyê. Girse, bi dirûşma “Şehîd namirin” ber bi mala şînê ve meşiya.
Hevserokê MEBYA-DER’ê Ramazan Dengîz di serdanê de axivî û got: “Her yek ji wan dema şehîd dibe, hevalên wan xwe deyndar dibînin. Ji bo em valahiyê tije bikin, divê em ji dil û can têkoşîna xwe bidomînin.”
Birayê Kandemîr, Galîp Kandemîr jî nameya birayê wî ku ji malbatê re hiştibû xwend.
Girse, piştre jî çû serdana taziyeya Omer Turk (Zinar Bahoz) ku di 24’ê Nîsana 2018’an de li herêma Avaşînê şehîd bibû. Taziye li navçeya Hênê ya Amedê hate danîn. Di serdanê de deqeyek rêz hate girtin. Birayê Omer Turk, Serhat Turk di taziyeyê de axivî û got: “Birayê min ne şehîdê me tenê ye, şehîdê gelê Kurd e. Ji bo îradeya gelê xwe têkoşiya. Em naxwazin êdî tu kes şehîd bibe. Ji bo vê divê hemû gel bi destên hev bigirin.”
WAN
Ji bo gerîlayê HPG’ê Ferman Turgut (Demhat Mamxurî) ku di 22’yê Adara 2018’an de li Xakurkê ya Herêmên Parastinê yên Medyayê şehîd bibû, mewlûd hate dayin. Endamên MEBYA-DER’ê, Platforma Saziyên Demokratîk û gelek kes bi girseyî çûn mewlûdê. Girseya ku beriya dayîna mewlûdê kom bû, heta mizgefta ku mewlûd lê hate dayin meşiya û dirûşma “Şehîd namirin” berz kir.
Serdan, piştî xwendina mewlûdê bi dawî bû.
