Tevgera Ekolojiya Kurdistan a Ewropayê (TEV-EKO), bi daxuyaniyekê ragihand ku 12’emîn Kongreya PKK’ê ya di 5-7’ê Gulana 2025’an de pêk hat, di têkoşîna azadî û demokrasiyê ya gelan de bûye qonaxeke nû.
TEV-EKO’yê, destnîşan kir ku biryarên di kongreyê de hatine girtin ne tenê ji bo gelê Kurd, ji bo gelên Rojhilata Navîn û cîhanê xwedî girîngiyeke dîrokî ne û ev tişt hate gotin, “Qonaxa ku em îro gihiştine, nîşan dide ku têkoşîna azadiyê û parastina gelekî ku ev nîv sedsal e didome, vediguhere formeke nû. Em nirxên hatine avakirin û berdêlên ji bo van nirxan hatine dayîn bi minetdarî û bi hişmendiyek mezin bibîr tînin.”
Di daxuyaniyê de hate gotin, “Talana xwezayê encama modernîteya kapîtalîst e û têkoşîna ekolojîk parçeyekî bingehîn ê demokratîkbûnê ye.”
TEV-EKO’yê, diyar kir ku ew xwedî li vê îradeya dîrokî derdikevin û bang li hemû tevgerên hawirdor û saziyên navneteweyî kir ku xwedî li vê îradeyê derkevin û piştgirî bidin çareseriyê.
TEV-EKO’yê, da xuyakirin ku paradîgmaya neteweya demokratîk ne tenê hebûna azad a nasname û çandan, di heman demê de parastina ekosîsteman, ji nû ve avakirina hevsengiya ekolojîk û jiyana civakî ya bi ahengiya bi xwezayê re di nava xwe de vedihewîne û got, “Bi vê hişmendiyê re, em pêvajoya heyî ne tenê weke gaveke siyasî di heman demê de weke pêvajoyeke veguherîna exlaqî-ekolojîk dibînin.”
TEV-EKO’yê di dawî de got, “Bi vê wesîleyê re, em bang li tevahiya gelên cîhanê bi taybetî jî gelê Kurdistanê dikin ku bên ba hev û bi awayekî hevgirtî xwedî li têkoşîna civaka demokratîk û jiyana ekolojîk derkevin.”
