Tevgera Komunîst a Şoreşger (TKŞ) têkildarî êrîşên li ser taxên Şêxmeqsûd û Eşrefiyê yên Helebê de daxuyaniyeke nivîskî weşand. Di daxuyaniyê e ev tişt ahtin parvekirin:
“HTŞ û çeteyên girêdayî dewleta Tirk, piştî hilweşandina rejîma BAAS’ê, dixwazin axa Rojava, Bakur û Rojhilatê Sûriyê dagir bikin. Çeteyên ku Şehba û Minbic dagir kiribûn, bi piştgiriya dewleta Tirk, ji Tişrîn û Qaraqozakê dixwestin derbasî axa şoreşê bibin. Armanca wan dagirkeriyê li hemû Bakur û Rojhilatê Sûriyê belav bikin. Lê wan nikarîbûn vê yekê bi ser bixin.
Dewleta Tirk a dagirker û çeteyên wê, ji 8’ê Kanûna 2025’an û vir ve, şahidê berxwedaneke bi rûmet bûn. Li eniya cepheyê berxwedana QSD, YPJ û şervanên komunîst, bi çalakiyên gel ên ku ji hemû bajaran dest pê kir û heta Bendava Tişrînê dirêj bû, me rê neda dijmin. Nobeta mertalê zindî ya li Bendava Tişrînê, biryardariya me û îradeya me nîşanî dijminê dagirker da.
‘EM Ê XETA SERKETINÊ BIDOMÎNIN’
Tişrîn, pêşî bi destê jinên pêşeng ên şoreşa Rojava hate parastin. Şervanên Tabûra Şehîd Serkan ên ku bi YPJ û QSD’ê re li xeta Deyr Hafir, Qaraqozak û Tişrînê bûn hêmana şer, roleke pêşeng û kedkar lîstin. Em bi rêzdarî hemû şervanên di vê berxwedanê da nemir bûne bi bîr tînin. Em soz didin ku em ê xeta serkeftina wan bidomînin.
‘GELÊ ME PAŞVE GAV NEAVÊT Û WÊ NEAVÊJE’
Gelên me, jinên ji hemû bajarên Bakur û Rojhilatê Sûriyê çûn nobetê li Bendava Tişrînê bigirin. Wekî pêkhateya komunîst a şoreşa Rojava, em jî ji hemû kantonan bi awayekî çalak beşdarî vê berxwedanê bûn. Ji 8ê Rêbendanê û vir ve, di vê berxwedanê da ku konvoyên me bi balefir û SÎHAyan hatin lêdan, li ser bendavê bombardûman hatin kirin, em beşdar bûn û serê me bilind e. Me di vê berxwedana nobeta dorveger da, bi dehan şehîd, bi sedan birîndar dan. Lê me gav jî paş ve navêtin. Û me dijminê faşîst nêzî bendavê nekir. Em li dora şervanên xwe yên ku li mevziyan bi birçîbûn û tîbûnê berxwedan didan bûn mertal. Bi dirûşma “Berxwedan jiyan e” gelê me bi ser bombeyan ve çû û bi vî awayî bi ser ket.
Çawa ku êrîşa dagirkirina faşîst Hitler bi berxwedana Stalingradê hate şikandin, çawa ku çeteyên DAÎŞ’ê ji Kobanê hatin derxistin, di destpêka sala 2025’an de jî berxwedana Tişrînê bi rûmet di dîrokê da hate nivîsandin.
‘HTŞ’Ê LI HEMBER GELÊ KURD ŞER ÎLAN KIRIYE’
Niha di destpêka sala 2026’an dw gefên dorpêçkirin û dagirkirina li ser şoreşa me ya Rojava hê jî didomin. Di sala borî da, çeteyên HTŞ’ê yên El Colanî, bi piştgiriya dewleta Tirk, li dijî gelên Elewî, Durzî û Xiristiyan êrîşên qirkirinê pêk anîn. Jin revandin, bi tecawiz û fidye êrîşên sûcên mirovahiyê kirin. Di hefteyên dawî de, li Helebê taxên Şêxmeqsûd û Eşrefiyê yên girêdayî Rêveberiya Xweser hatin dorpêçkirin. Gelek caran êrîş tên kirin, ji ber bombardûmanan windahiyên canî çêdibin. Ji doh ve çeteya HTŞ, li hember gelê me yê Şêxmeqsûd û Eşrefiyê û QSD’ê şer îlan kiriye. Taxên Kurdan ên li Helebê, bi tanq û çeken giran hat dorpêçkirin. Bombardûmanên bê serûber tên kirin. Bi dehan kes birîndar bûn, gelek kes hatin qetilkirin. Çete dixwazin taxên Şêxmeqsûd û Eşrefiyê vala bibin û zorê dide da ku gelen me yên di qadên Rêveberiya Xweser de dijîn axên xwe biterikînin.
‘BI BERXWEDANÊ ÊRÎŞAN VALA DERXIN’
Di van rojên pêşîn ên sala 2026’an de, em dibînin ku ji bo gelên me berxwedan rêya rizgariyê ya yekane ye ji bo jiyana wekhev û azad. Rihê berxwedana Tişrînê, îro ji taxên Şêxmeqsûd û Eşrefiyê yên Helebê heta hemû bajarên Rojhilata Navîn belav dibe. Gelê me bibiryar û rêxistinkiriye. Wê axên xwe qet neterikîne û bi berxwedanê êrîşên çeteyên faşist vala derxîne. Em berxwedana bi bedela şehîdan berdewan dike, silav dikin. Em bangewaziyê di serî de li hemû gelen Bakur û Rojhilatê Suriyê û li tevahiya gelen cîhanê dikin da ku piştgiriya bi gelp Şexmeqsud û Eşrefiyê re mezin bikin.
‘SERHILDANA GELÊ ME YÊ ROJHILAT’
Li Rojhilatê Kurdistanê û bajarên Îranê, bi pêşengiya gelê me yê Kurd, gelên bindest bi rojan e li dijî rejîma melayan a faşîst a Îranê berxwedan dikin. Berxwedana Tişrînê bi agirê berxwedana gelan a li bajarên Rojhilatê ra hevdît.Em serhildana ku li Rojhilatê Kurdistanê û hemû bajarên Îranê berdewam dike silav dikin. Em nûçeyên ku gelê me yê Rojhilatê dest bi azadkirina bajarên xwe kirine distînin. Serhildana gelê me yê Rojhilatê ji bo hemû gelên me yên Kurdistanê û armanca me ya Kurdistana yekgirtî gelek girîng e. Ji Rojavaya ku parastina şoreşê didomîne silav li wan ên ku ji bo şoreşê li Rojhilatê kolanan tijî dikin. Em bang li hemû gelan, bi taybetî li gelê Rojhilatê dikin: “Baweriya xwe bi serkeftinê bînin, ji bo bi ser bikevin ruhê berxwedana Tişrînê li xwe bikin.
RONAHIYA ROJAVA LI SÛRIYEYÊ BELAV BIKIN
Berxwedana Tişrînê, bi şêwazê rêxistinkirinê û ruhê xwe yê şoreşgerî, îro cihnîşa têkoşîna me ye. Wek ku me dûh li Tişrînê kir em ê îro jî li Şexmeqsut û Eşrefiyê parastina şoreşa xwe bidomînin. Em ê şoreşa jinan a Rojava biparêzin û bidin jiyîn. Em ê dawî li tarîtiya cîhadîst a faşîst û zilamperest ên ku li bajarên Sûriyeyê qirkirinê dikin bînin. Em ê ronahiya şoreşa Rojava li hemû Sûriyeyê û Rojhilata Navîn belav bikin.”
