Serokê DYE’yê li ser platforma xwe ya Truth Socialê got, “Dewletên Yekbûyî yên Emerîkayê ji bo parastin û piştgiriya bi Îsraîlê re salê bi milyaran dolarî xerc dike. Ev rêje ji xerckirina ji welatekî cuda pir pir zêde ye.”
Trump bal kişand ser doza li Îsraîlê dewam dike û got, “Em ê vê tolere nekin.”
Serokê DYE’yê ji bo Binyamin Netanyahu got, “Bi Hamasê re ji bo berdana dîlgirtiyan danûstandinan li ser peymanekê dike. Çawa dibe ku zext li Serokwezîrê Îsraîlê bê kirin ku tevahiya rojê li salona dadgehê bimîne.”
Roja Înê, dadgeheke îsraîlê daxwaza taloqkirina rûniştinên doza nelirêtiyê ya Netanyahu ji bo du hefteyan red kiribû.
Parêzerê Serokwezîrê Îsraîlê şerê bi Îranê re, şerê li Xezeyê weke hinceta ‘bûyerên li herêmê û cîhanê’ nîşan da û xwest, doza ku hefteya bê jinûve bê destpêkirin bê taloqkirin. Piştre ji bo du rûniştinên bê werin betalkirin daxwaznameyeke nû pêşkêşî dadgehê kir.
Donald Trump roja Çarşemê di daxuyaniyekê de xwestibû doz bê betalkirin.
Trump her wiha roja piştî ragihandina agirbesta navbera Îsraîl û Îranê pêşniyar kiribû ku “Qehremanê mezin bê efûkirin.”
Netanyahu di rûniştinên ku Gulana 2020’î destpê kiribûn û çend caran hatin taloqkirin, îdîa kiribû ku ti sûc nekiriye.
Di doza destpêkê de Netanyahu tê sûcdarkirin ku li gel hevjîna xwe Sara Netanyahu di berdêla başiyên siyasî de bi buhayê 260.000 dolarî berhemên luks ên weke puro, mucewher û şampanya ji milyarderan qebûl kiriye.
Di du dozên din de jî Netanyahu tê sûcdarkirin ku bi du saziyên medyayê yên Îsraîlê re bazarî kiriye ku nûçeyên erênî biweşînin.
