Partiya Wekhevî û Demokrasiyê ya Gelan (DEM Partî) di çarçoveya ‘’Hevdîtinên Nan, Adalet û Aştiyê’ de bi nûnerên rêxistinên civaka sivîl yên Edeneyê re civiya. Civîn li otêleke bajêr pêk hat û Hevseroka Giştî ya DEM Partiyê Tulay Hatîmogûllari û Hevseroka Giştî ya HDP’ê Sûltan Ozcan jî di nav de gelek kes beşdarî civînê bûn.
Tûlay Hatimogûllariyê bal kişand ser geşedanên ku li Rojhilata Navîn rû didin û diyar kir ku Rêveberiya Xweser a Bakur û Rojhilatê Sûriyeyê di bin gefê de ye û li hemberî êrîşên HTŞ’ê yên li ser Elewiyan nerazîbûnên xwe nîşan dan û got: ‘’Em dizanin ku li hemberî hemû beşên civakê qirkirinên mezin û êrîş pêk tên. Hewcehiya me bi aşitiyê heye. Ji ber ku cîhan bi şerekî mezin re rû bi rû ye.’’
PEYAMÊN RÊBER APO HATIN SILAVKIRIN
Tulay Hatîmogûllariyê bal kişand ser hevdîtinên Îmraliyê û peyamên Rêber Apo û ev yek anîn ziman: ‘’Birêz Ocalan wiha gotiye: ‘Dibe ku hewl bidin her qadan veguherînin Xezeyê. Divê em rê nedin vê yekê. Ji ber wê yekê divê têkildarî dabînkirina aşitiya navxweyî pêngavên hewce û şênber werin avêtin. Divê em hemû bi hev re vê yekê bikin. Li hemberî van geşedanan ji bilî aşitiyê rêyeke din a cuda tune ye.’ Divê em bala xwe bidin gotina Birêz Ocalan ya têkildarî demokratîkbûyînê.’’
BERTEKA LI HEMBERÎ ÊRÎŞAN
Tulay Hatinogûllariyê di dawiya axaftina xwe de bal kişand ser êrîşên heyî û wiha got: ‘’Em alîgirên aşitiyê ne. Em dixwazin pirsgirêka Kurd were çareserkirin. Ji bo vê yekê em amade ne ku ji ya destê me tê bikin. Birêz Ocalan jî vê yekê dibêje. Bi desteserkirina şaredariyan, girtina rojnamevanan û çewisandina aliyên muxalîf aşitî û demokrasî nayên dabînkirin. Em li vir bang li dewletê û desthilatdariyê dikin ku hêviyên aşitiyê tune nekin. Divê ji bo aşitiyê pêngavên hewce werin avêtin.’’
