Wezîrê Karên Derve yê Hollandayê Caspar Veldkamp di civîneke Yekîtiya Ewropayê (YE) de daxuyanî da û ragihand ku hevdîtin wê li Romayê bên kirin.
Du çavkaniyên dîplomatîk ên ji navenda Romayê jî, daxuyanî dan AFP’ê û gotin, “Rûniştina duyemîn a hevdîtinên nerasterast ên di navbera Îran û DYE’yê de, tê plankirin ku roja şemiyê li paytexta Îtalyayê bên kirin.”
Ji sala 1980’an ve têkîliyên dîplomatîk ên her du welatan nînin. Her du welat bi navbeynkariya Umman’ê 12’ê Nîsanê roja şemiyê li ser meseleya nukleer a Îranê hevdîtin kirin.
GROSSI DIÇE TEHRANÊ
Her wiha Serokê Ajansa Enerjiya Atomê ya Navneteweyî (UAEA) Rafael Grossi roja duşemê daxuyanî da û ragihand ku beriya hevdîtinên tûra duyemîn a Îran û DYE’yê, ew ê “di nava vê hefteyê de” serdana Tehranê bike.
Grossi di daxuyaniya li ser X’ê dayî de, wiha got: “Di demeke ku pêdiviya lezgîn bi çareseriyên dîplomatîk heye de, girîng e ku bi Ajansê re angajman û hevkarî were domandin.”
Li gorî çavkaniyeke dîplomatîk a ku AFP’ê xwe gihandiyê, tê plankirin ku serdan roja pêncşemê were kirin.
