Welat Esen ê ku di 6’ê Kanûna 1994’an de li Îzmîrê bi sûcdariya “endamtiya rêxistinê” cezayê muebetê lê hat birîn, piştî 31 salan di 28’ê Mijdarê de ji Girtîgeha Ewlehiya Bilind a Antalyayê hat berdan. Welat Esen li Girtîgeha Bûca ya kevn, Girtîgeha Tîpa H a Konyayê, Girtîgeha Sîncanê, Girtîgeha Tîpa F a Kırıkkaleyê û herî dawî li GIrtîgeha Ewlehiya Bilind a Antalyayê ma û li wir hat berdan.
Esen îro vegeriya cem malbata xwe ya li Îzmîrê. Esen ji aliyê malbata xwe, rayedarên Komeleya Anatoliyê ya Alîkarî û Hevgirtinê bi Kesên ku Xizmên Xwe Winda Kirine (ANYAKAYDER) û rêveberên DEM Partiyê ve hat pêşwazîkirin. Esen ê ku bi tilîlî û kulîlkan hat pêşwazîkirin got, “Ez hêvî dikim ku em ê azadiya hevalên xwe jî bibînin. Rojên serketinê nêzîk in.”
Piştre, rêvebera ANYAKAYDER’ê Zarîfe Karasûngûr hêviya xwe ji bo azadkirina hemû girtiyên siyasî anî ziman û ji bo wan jiyaneke azad xwest.
