Wargeha Mexmûrê piştî dorpêça PDK’ê, vê carê bi dorpêçek din a hikûmeta Iraqê re rû bi rû ye. Ji 10’ê Nîsanê ve Iraq rê nade kel û pel bikevin nava wargehê, rê nade karker biçin ser karên xwe û nasnameyên xelkê wargehê nû nakin.
Ji bo çareserkirina pirsgirêka nasname û ambargoya li ser wargehê şandeyek ji Meclîsa Gel a Mexmûrê çûbûn Bexdayê, piştî bi Wezareta Edaletê re hevdîtin kir, di vegerê de hate binçavkirin. Li ser vê yekê danê sibehê xelkê Mexmûrê bi awayekî girseyî li dijî zêdebûna zextên hikûmeta Iraqê yên li ser wargehê dest bi meşê kirin. Di meşê de bênavber dirûşmên ‘Bijî Berxwedana Mexmûrê’ berz kirin.
Xelkê Mexmûrê ku heta benda kontrolê ya ku hêzên leşkerên Iraqê kontrol dikin, helwesta raber kirin. Di encama hevdîtinek li ser lingan hate kirin de hate gotin nava çend saetan de şandeya Meclîsa Gel a Mexmûrê ya hatî girtin wê berdin. Li wir daxuyaniyek hate dayîn ku heta şande neyê berdan wê çalakî bidome.
Li ser vê yekê xelkê Mexmûrê ji bo xwedî derketina li îradeya xwe, li ber benda kontrolê hêzên Iraqê konê çalakiyê vedan. Girseya gel li konê çalakiyê, helwest û berxwedana xwe berdewam dike.
