Malbatên şehîdan ên li Kobanê li ser xeta berxwedanê, li ser piştevaniya bi hêzên xwe QSD, YPG û YPJ’ê bi biryar in. Endamên Meclîsa Malbatên Şehîdan a Kobanê Suphî Beg Bîn Xelîl û Nisrîn Brahîm ji ANF’ê re axivîn.
Suphî Beg Bîn Xelîl ku bavê şehîdekî ye anî ziman ku xelkê Kobanê biryar daye ku heta mirinê li ber xwe bide.
Suhpî Beg Bîn Xelîl got, “Em ê li pey şehîd û qehremanê xwe bin. Çi ji me bê em ê bikin. Em teslîmkariyê ti carî ji miletê Kurd re qebûl nakin, heta dilopek xwîna me heye. Em ê şev û roj li ser karê xwe bin. Em natirsin. Ku em bitirsiyana em ê li sedê bitirsiyana, em ê ji Efrînê bitirsiya. Em çûn piştgiriya Efrînê. Em du, sê caran çûn sedê û me bi zora xwe jî stend.”
Bavê şehîd Bahoz, Suphî Beg Bîn Xelîl diyar kir ku ew her şehîdekî weke keç û kurê xwe dibîne û destnîşan kir ku rêya wan rêya berxwedanê ye û heta ji wan bê wê ji vê rêyê venegerin.
‘EM PIŞTA XWE NASPÊRIN TI HÊZ AN JÎ DEWLETEKÊ; EM BI YPG Û YPJ’Ê RE NE’
Endama Meclîsa Malbatên Şehîdan Nisrîn Brahîm jî diyar kir ku ya li pêşiya wan serketin e, ew ti carî paşve venagerin û got, “Em ê li pişt şervanên xwe YPG û YPJ’ê bin. Em ti carî pişta xwe naspêrin kesî. Dewletên navneteweyî, Emerîka van hemûyan xiyanet li me kirin. Tenê pişta me çiyayê me ne. Em Kurd hemû bibin yek. Dema em bibin yek, kes nikare îradeya gelê Kurd bişikîne. Em ti carî teslîm nabin û dev ji axa xwe bernadin. Çawa ku me di sala 2014’an de DAÎŞ li Kobanê şikand, dîsa jî yên ku êrişî Kobanê bikin wê bibe goristana wan.”
Nisrîn Brahîm anî ziman ku ji bo berxwedanê çi ji wan bê xwestin wê bikin û axaftina xwe bi vî rengî dewam kir; “Em ê çekê jî rakin, em ê berxwedanê jî bikin. Em ê li pişt QSD, YPG û YPJ’ê bin. Çi ji me bê xwestin em ê bikin. Em ti carî teredût nabin. Îro rêya hebûn û tinebûna me ye. Em bimirin em ê hemû bimirin, em bi ser bikevin em ê hemû bi ser bikevin.”
