Fermandariya Giştî ya Yekîneyên Parastina Gel (YPG) bi muhasebeta salvegera 13’an a Şoreşa 19’ê Tîrmehê daxuyaniyek weşand.
Peyama Fermandariya Giştî ya YPG’ê wiha ye:
“Bi navê Fermandariya Giştî ya YPG’ê, em salvegera 13’emîn a Şoreşa Rojava bi coş û serfirazî li hemû gelên Bakur û Rojhilatê Sûriyeyê, malbatên şehîdan û tevahiya cîhanê pîroz dikin. 19’ê Tîrmehê sembola berxwedan û azadiya gelê me ye ku di dîroka Kurdistanê, Sûriyê û Rojhilata Navîn de qonaxeke nû vekir.
Em bi hurmet hemû şehîdên xwe ku ji bo parastina vê şoreşê jiyana xwe daye, bi bîr tînin. Berxwedana gelê me, hêzên YPG û YPJ’ê, li dijî DAIŞ’ê û hêzên dagirker bûye mînakeke qehremaniyê ku ne tenê herêm parast, lê bandor li ewlehiya cîhanê jî kir.
Şoreşa Rojava, ji sala 2012’an ve, bi keda bi deh hezaran şoreşgerên ji hemû perçeyên Kurdistanê, gelên Sûriye û şoreşgerên ji çar aliyê cîhanê, bû xwedî xisletek enternasyonaîst û nîşan da ku îradeya gel li hember zilmê bi ser dikeve. Ev şoreşa ku bi pêşengiya jinan û ciwanan li dar ket, ji bo hemû gelên herêmê bûye çirûska hêviyê. Rojava îro wekî modeleke demokrasiyê, ku li ser wekhevî û hevjiyana aştiyane ava bûye, li cîhanê tê naskirin. Me îspat kir ku hevjiyana gelan li Rojhilata Navîn mimkun e. Di salvegera şoreşa me de, herêma me bi tevahî û Sûriye bi taybetî, di nav rewşek aloz û bi pevçûn re derbas dibe. Em careke din destnîşan dikin ku tu hewldana rêveberî û tu tevgerek siyasî a ku rêzê li cihêrengî û pirçandiya herêmê negire, nikare bi awayekî serkeftî şerê navxweyî ya 14 salan bi dawî bike. Çavkaniya qeyrana Sûriyê ya 14 salan, hişmendiya despotîk bû ku yekdengî û yekrengiyê li ser gelê Sûriyê ferz dikir. Îro, heman şaşîtî wê qeyranek hîn mezintir bi xwe re bîne.
Bi helkeftina salvegera 13’emîn a şoreşa me, em soz didin ku têkoşîna ji bo azadî û dadmendiyê bidomînin û em destnîşan dikin ku hêzên me wê li hember hemû metirsî û xetereyên li dijî gel û şoreşê têkoşîna xwe bidomînin.”
