Di salvegera 6’emîn a dagirkirina bajarên Serêkaniyê û Girê Spî yên Kantona Cizîrê ya Bakur û Rojhilatê Sûriyeyê de, ku 9’ê Cotmeha 2019’an ji aliyê dewleta Tirk û komên wê yên çete ve hatin dagirkirin, şervanên Meclîsa Leşkerî ya Til Temirê ji ANF’ê re axivîn.
‘ÊRÎŞ BIRIN SER HER KESÊN LI BAJÊR’
Endamê Meclîsa Leşkerî ya Til Temirê û şervanê ji Serêkaniyê Demhat Serêkanî anî ziman ku şopên êrîşa 9’ê Cotmeha 2019’an hîn teze ne. Serêkanî diyar kir ku êrîşan bi êrîşên hewayî destpê kirin, li hemberî her kesên li bajêr çi sivîl çi jî şervan êrîşên berfireh hatin kirin.
Serêkanî got, “Destpêkê bi balafirên şer êrîş kirin. Sivîl, leşker her kesên li bajêr kirin hedef û êrîş kirin. Di encama êrîşan de 10 rojan berxwedan hate kirin û gelek hevalên me şehîd bûn. Ez jî di nava wê berxwedanê de bûm; wê demê birîndar bûm. Yekane daxwaza me ew bû ku Serêkaniyê nekeve destê hêzên dagirker.”
Serêkanî ragihand ku di dema şer de çekên giran û qedexekirî li hemberî gel û hevalên wan hatin bikaranîn û got, piştî 6 salan jî êşa wê hîn di nava jiyana rojane de ye.
Şervan soza ku da gelê Serêkaniyê û şehîdan nû kir û got, “Weke gelê Serêkaniyê, weke şervanekî ji Serêkaniyê ji sala 2011’an heta 2019’an me li ber xwe dan, şehîd dan, îro jî şehîdan didin. Em soza ku me dane şehîdan û gelê xwe dubare dikin û dibêjin, me Serêkaniyê ji bîr nekirine. Zû yan jî dereng em ê teqez li Serêkaniyê vegerin; bi şer yan jî bi siyasetê be. Soza ku me dane gelê xwe û şehîdan ev e: Em ê Serêkaniyê ji dewleta Tirk û çeteyên wê re nehêlin. Êşa Serêkaniyê, qîrîna zarokan her roj bi me re ye. Heta ku li bajarê xwe vegerin em ê şer bikin; heta dilopa dawî ya xwîna xwe.”
Axaftina xwe bi gotin, “Şehîd namirin û Bijî Serok Apo” bi dawî kir.
‘BI BARBARÎ ÊRÎŞ KIRIN, GUND TALAN KIRIN’
Ciwan Seydo jî 9’ê Cotmeha 2019’an weke “Êrîşeke berfireh û barbar” pênase kir. Seydo anî ziman ku di êrîşên dewleta Tirk a dagirker û komên wê yên çete de li Serêkaniyê û Girê Spî bajar û gundên derdorê hatin talankirin û bang li gel kir ku bi hêvî be. Ciwan Seydo got, “Gelê me yê Serêkaniyê û Girê Spî bila bi hêvî be; em ê ti carî dest ji bajarên xwe bernedin. Êdî hêzeke me weke QSD, YPG û YPJ heye; bila ji van hêzan bawer bikin. Azadî nêzîk e. Hebûna me ya li Til Temirê ji bo Serêkaniyê, Girê Spî û Efrînê ye.”
Seydo diyar kir ku Meclîsa Leşkerî ya Til Temirê û hêzên wan ên leşkerî ji bo rizgarkirina van bajaran timî amade ne û ew li benda “dema rast” disekinin.
‘TALAN Û HILWEŞÎNA BI NAVÊ ÎSLAMÊ HATE KIRIN’
Dilşer Cûdî jî êrîşên 9’ê Cotmehê weke talan û hilweşîna “Bi navê Îslamê” pênase kir û got, “Dewleta Tirk a dagirker û komên ê yên çete bi navê Îslamê êrîşî bajarên me kirin, talan kirin, dizî kirin. Gelê me neçar ma ku koç bike. Gelê me hîn jî koçber e û li cihekî cuda ye.
Em li nava refên YPG û QSD’ê şer dikin. Me ev kincê leşkerî li xwe kir û em ê herdu bajarên xwe rizgar bikin. Em ê tola şehîdên xwe hilînin; ya gelê xwe ji nû ve bi dest bixin.”
‘EM Ê ÇETEYAN JI BAJARÊ XWE DERXÎNIN’
Axanis Ciwan jî destnîşan kir ku divê dewleta Tirk û çeteyên wê ji bajarên dagirkirî bêne derxistin û ragihand ku ji bo vegerê pêwîstî hinekî bi demê heye lê belê wê pêk bê. Axanis Ciwan got, “Bajarê me ye, xaka me ye. Em ji gelê xwe yê koçberbûyî re dibêjin: Hûn ê vegerin. Ti tiştekî çete û dewleta Tirk wê li bajarên me nemînin.”
